فصباح توقيع ميثاق الأغلبية.. البام داير تحالف مع البي جي دي المعارضة فالبرلمان وقربلها ضد وزير الميزانية ولقجع كاعي: ميمكنش نقبل الشك فالنوايا من الاغلبية

الأغلبية لي دارت ميثاق شرف باش تكمل ف التنسيق والانجسام تفرتكات أثناء التوقيع على هاد الميثاق، بحيث ضم فريق البام بلجنة المالية صوته إلى المعارضة (البي جي دي) بخصوص تعديل وافق عليه مجلس المستشارين.
هشام المهاجري رئيس لجنة الداخلية وعضو المكتب السياسي للأصالة والمعاصرة وعبد الله بوانو القيادي فالبي جي دي، شككو ف نوايا الحكومة لي قبلت تعديل ف مشروع ميزانية 2022 ويتعلق بامتياز ضريبي لبعض المنشآت باش تعاود تستثمر المبلغ الصافي الاجمالي من الضريبة لي جايا من عائدات تفويت عناصر الاصول الثابتة، بتخفيض ضريبي مهم وكبير. هاد التعديل غايتسفدو منو بعض الشركات.
المهاجري شكك فالطريقة باش قبلت الحكومة هاد التعديل فمجلس المستشارين.
فوزي لقجع بحضورو القوي ف لجنة المالية، معطلش المهاجري وقاليه مغاديش نقبل التشكيك ف النوايا، ولكن يجيك الشك من الأغلبية اللي كتوجد المشروع ماشي مقبول.
"تما ترونات وناض المهاجري حيح وقال بلي ميمكنش يقبل ان تتم مصادرة حقه في الكلام.
لقجع كان واضح وهدد بالانسحاب من اللجنة.
مصادر برلمانية قالت بلي كلام لقجع كان معقول لانه ميمكنش يقبل يجي الشك من عضو فالأغلبية وقيادي فحزب هو الثاني فالحكومة.
المهاجري ضرب ميثاق الاغلبية لي صادق عليه امينو العام غير هاد الصباح. هاذشي كيخلي المتتبعين يقولو بلي البام ماشي حزب ديال التحالف لأنه اول حزب من خرق الميثاق بعد توقيعه بثواني قليلة.