ترونات بين الاحزاب قبل انتخاب عمدة الرباط والسلطة حبسات الصحافة.. مصادر ل"گود": الصراع كبير بين ولد لشگر واغلالو ..وانقسام فوسط الاحرار والحركة الشعبية

لبارح دارو اجتماعات ليلية بين عدد من الغاضبين فالاحزاب باش يشتتو التحالف الثلاثي (البام، الاحرار والاستقلال) بسبب طريقة توزيع الرئاسة ديال عدد من المقاطعات بالعاصمة الرباط .
المعطيات للي توصلت بها "گود" تفيد بلي كولشي دبا التزم بالتحالف الثلاثي الى حدود كتابة الاسطر، خصوصا الغاضبين باش يصوتو لمرشح التحالف، اسماء اغلالو، القيادية في حزب الاحرار.
حاليا كاين النصاب، باقي التلفونات خدامين باش يجيبو المستشارين، تقريبا ما يفوق 42 مستشار حضرو.
وقالت مصادر "گود" بلي الصراع كبير بين اسماء اغلالو ومرشح الاتحاد الاشتراكي لحسن لشگر، بحيث كاين انقسام وسط الاحرار خصوصا مجموعة عمر البحراوي ومجموعة يعقوب المنصور (10 مستشارين بجوج باغي يصوت لصالح الاتحاد).
كذلك كاين انقسام وسط مستشاري الحركة الشعبية لي عندها 8 مقاعد. نفس الشيء البام منقسم، بحيث كاين تيار ضد التحالف الثلاثي. البام عندو 13 مستشار.
في حالة مجابتش اغلالو اغلبية اعضاء المجلس (42)، غايمشيو للدور الثاني (مع اللي جاب الرتبة الثانية) وحتى فهاد الدور خصهم يجيبو ثاني نفس الشيء (42). وفي حالة مجابوش اغلبية غايمشيو للدور الثالث.
الدور الثالث غاتكون الاغلبية بعدد الحاضرين للتصويت.
وعاينت "گود" منع الصحافة من ولوج قاعة التصويت بولاية الرباط، بمبرر عدم بدء اشغال التصويت.
هاد المنع معجبش عدد من الصحفيين لي بقاو واقفين قبالت الولاية كثر من 40 دقيقة. تمنعو يشوفو شنو واقع للداخل ويشوفو الكواليس .