مجموعة البي جي دي فالبرلمان تغداو عند بنكيران.. خداو التوجيهات وكيفاش خصهم يعارضو بلا بوليميك

علمت "گود" من مصدر حزبي، أن مجموعة العدالة والتنمية بمجلس النواب، تغداو اليوم عند زعيمهم عبد الاله بنكيران، في منزل الاخير.
طبعا اللقاء كانت فيه مساجات سياسية من بنكيران لفرقتو فالبرلمان، يبعدو على المعارضة ديال الغوات ويقدمو نموذج جديد.
بنكيران سبق له نبه الفريق باش مايدخلوش فمناوشات مجانية ضد الحكومة.
السياق ديال اللقاء، باين، هاد الحزب باقي مصدوم وتالف بعد تسونامي ديال 8 شتنبر. حزب كيقلب يبني راسو ولكن تالف ومعارفش كيفاش باقي افكارو مرتبطة بالدين ومطورش راسو عقائديا وفكريا، باقي نفس الطريقة فالاشتغال.
بنكيران عزيز عليه يلعب على التناقضات، مداخلتو الأخيرة فالمجلس الوطني، هاجم جهات دون يسميها، قال بلي هي كتحرك بعض الكراكيز ونشطاء الفايسبوك باش يديرو حملة ضد اخنوش فهاذشي ديال ارتفاع الاسعار دوليا. بنكيران هاجم مايسة سلامة الناجي هاجم كذلك صحافيين، ودوز مساجات للدولة وقالي بلي يلا كان اخنوش خصو يمشي ضروري الملك يدير انتخابات سابقة لاوانها بعد عام.