دراسة: 20% من المغاربة كايعانيو من الغلظ المفرط.. ومصابة بداء السمنة ل"كود": الغلظ عندوا اسباب كثيرة.. والتنمر على مظهر الناس ماشي مزيان

المسح الوطني لعوامل الخطر الشائع للأمراض الغير المعدية، خرج في آخر بحث ليه سنة 2017-2018، بمعطيات كتبين أن معدل الغلظ او السمنة عند البالغين لي عمرهم مابين 20 عام هو 53 فالمئة، و20% منهم عندهم السمنة المفرطة.
وحسب التفاصيل لي نشرتها جريدة "الصباح"، السمنة المفرطة منتشرة أكثر في المناطق الحضرية (22،8%)، و(14،9%) في المناطق الريفية، و (29%) من العيالات معرضات أكثر لهاد النوع من سوء التغذية، والرجال(11%)، ووزارة الصحة قالت بلي الغلظ انتاشر بنسبة 34% مابين 2004 و2017.
حسنة 27 عام موظفة في قطاع التجارة، مصابة بداء السمنة ، الوزن ديالها 80 كيلو، وطولها 1،56 متر، صرحات ل"كود" ان الغلظ فيه أنواع، وفنظرها الناس الغلاظ كيعيشو حياة طبيعية، وهي وحدة منهم.
واكدات حسنة انها مكرهاتش تنقص الوزن ، واضافت انه خاصها تتبع نظام غذائي صحي باش ماتمرضش، ولكن كتأكد ان الغلظ عمروا كان عائق وعمروا ماغادي يكون عائق لأي واحد، والتنمر على مظهر الناس ماشي مزيان.
وقالت حسنة: فنظري الغلظ عندوا اسباب كثيرة، كينين ناس كي تعصبوا كياكلوا بزاف، وكاين لي كيغلاضو بسباب دوا كيشربوه، وكاين لي عندوا مشكل فالغدة الدرقية، أو كاين لي عندوا مشكل فالهرمونات بحالي.