جوج سيمانات على الغزو الروسي لاوكرانيا: وقف اطلاق النارلممرات انسانية وامريكا رفض الغاز الروسي والصين راه كلشي غادي يخسر وكوكا كولا مع ستارباكس وماكدونالد مشاو من بلاد بوتين

مازالت الحرب فاوكرانيا او غزو روسيا لاوكرانيا مستمر. معاه مستمرة معاناة ملايين الاوكرانيين. كاين شوية الامل مع اعلان روسيا اليوم عن وقف جديد لإطلاق النار بهدف السماح بإجلاء مدنيين من مدن أوكرانية.
الروس قالو باللي هاد الممرات غادية تسمح لكييف وتشيرنيهيف وسومي وخاركيف وماريوبول. يخرجو. يتبعو هادوك مليونين اللي غادرو لبلاد من نهار بدا الغزو غالبيتهم اطفال ونساء. الرجال ممنوع عليهم يغادرو لبلاد.
هاد النهار من الحرب كانت امريكا البارح منعات استيراد النفط والغاز الروسي. وقال الرئيس بايدن "نحن نحظر جميع واردات روسيا من النفط والغاز والطاقة. لن يكون النفط الروسي مقبولاً في موانئ الولايات المتحدة بعد الآن"، طبعا تبعاتو بريطانيا اللي كتسورد 20 بالمائة من حاجياتها من الغاز من روسيا. غير هي لندن قالت ما غادياش تبقى تستورد هاد العام. يعني القرار غادي يبدا العام الجاي.
البارح ردات موسكو بحظر استيراد المواد الخام من والى روسيا. واش النفط فيهم؟ مازال رئيس الحكومة الروسي غادي يحدد هاد القائمة.
اوربا حاصلة. 40 بالمائة من حاجياتها فالطاقة كتجي من روسيا. 40 بالمائة من الغاز و30 بالمائة من البترول. المانيا مثلا كتسورد اكثر من 50 بالمائة من حاجياتها من النفط وشي دول بحال ليتوانيا وفلندا كتوصل النسبة لمائة بالمائة. يعني ما عندهمش لاين من الغاز والبترول الروسي. هادا ما كيفسر تحذير الخارجية الصينية، اليوم الأربعاء، مما سمته "عواقب فرض عقوبات تستهدف صادرات الطاقة الروسية". الصين قالت راه كلشي غادي يخسر بهاد الخطوة
وعبر المتحدث باسم الخارجية الصينية عن معارضة بلادو "بشدة العقوبات غير ه أحادية الجانب التي لا تستند إلى القانون الدولي. والتلويح بعصا العقوبات لن يجلب لنا السلام والأمن، ولن يؤدي إلا إلى مشاكل خطيرة للاقتصاد ونوعية الحياة في البلدان المعنية".
وسط استمرار الحرب لليوم 15 المعارك كتواصل وممكن تتعقد اكثر. امريكا رفضات عرض قدماتو ليها بولونيا كتقترح فيه "إرسال جميع طائراتها المقاتلة من طراز ميغ 29 روسية الصنع إلى أوكرانيا عبر قاعدة جوية أمريكية في ألمانيا".
الناتو حتى هو رفض العرض وقال باللي ما باغي صداع مباشر مع روسيا
امريكا مركزة غير على العقوبات الاقتصادية. البارح كل من ماكدونالدز وكوكاكولا وستاربكس انضمو لقائمة الشركات اللي وقفات نشاطها فروسيا