كومبا ماشي ماتش. 3 ساعات الجحيم عاشها الاسود فمطار كنشاسا. طوفوهم وخلطوهم بالجمهور وطلعوهم ونزلوهم عضو من الوفد ل"كود": فلحظات بانت لينا الموت قريبة بزاف وكانو كيهددونا بالدبح

البارح 25 مارس 2022 المنتخب المغربي لكرة القدم والوفد اللي معاه عاش 3 ساعات الجحيم فمطار كينشاسا. قبل هاد الساعات. كان عاش الجحيم فلوطيل. فالتنقل ديالو باش يمشي يتريني. سالى الماتش تعادل. تعرض المنتخب والوفد اللي معاه للهجوم بالقراعي بطريقة غريبة.
شي وحدين حاولو يختاصرو نهاية الماتش فالذهاب المؤهل لمونديال قطر واللي سالى بواحد لواحد٬ بصورة رئيس الكونغو وولادو مع حكيمي والمدرب وحيد وفوزي لقجع. طبعا هادي ما كان عندها تأثير ابدا على امن اللعابة
بعد الماتش خرج الرئيس وولادو وبقى الوفد المغربي كيتعرض للخطر.
الوفد قرر انو غير يسالي الماتش يمشي للمطار. بعد الصعوبات لكبيرة وتضرب فيها شي وحدين من الصطاف المغربي٬ كان كلشي فالمطار مع الثمنية وعشرة الدقايق من ليلة البارح الجمعة. بدات اجراءات غير مفهومة. وفق مصدر ل"كود" "اولا خلطونا مع الجمهور المغربي. ثم بداو كيرسلونا من بلاصة لبلاصة. اه راه بلاصتكم فالجيهة لخرى من المطار. كنتمشاو لمسافة كبيرة ومن بعد يرجعونا. ما فهمنا والو. هاد الشي بقى تقريبا حتى قربات لحداش. يعني شي 3 سوايع تقريبا. كنا موجدين كلشي والطيارة من السبعة وهي فالمطار. دوزنا كوفد رسمي 10 الكونطرولات". هاد الشي اللي وقع فالمطار غير استمرار اللي عاشوه من نهار وصلو.
مصدر ل"كود" قال باللي هو وعدد من اعضاء الوفد حسو باللي الموت قريبة "كيجي حداك مواطن من الكونغو. ماشي بعيد بجوج ميترو او كثر. اللا حداك. وكيقول ليك غادي ندبحك. كتحصل وسط الجمهور. كيجيو عندك للوطيل ويصدعوك. راه كانت معاناة حقيقية"
هاد التهييج لعبات فيه السياسة دور كبير. رئيس الكونغو كينشاسا تشيسيكيدي تشيلومبو عندو انتخابات رئاسية. محتاج يعطي لجمهور بلادو تأهيل محرومين منو من 1974. دار كلشي باش يربحو المغرب تماك باش تكون حظوظهم للتأهيل لمونديال قطر مضمونة. رئىس الحكومة كان كيشرف شخصيا على كل صغيرة وكبيرة فالمنتخب. هاد رئيس الحكومة قال بوضوح وما تسوق لحد "واصلو الضغط على بعثة المغرب" اي واصلو التهديد وخلعوهم. الفيديو كاين ووصل لعند الفيفا.
وصول البعثة للمغرب هاد الصباح خلى كلشي يقول "اووف. وصلنا بيخير لبلادنا".