اييه المغرب دار صفقة وصفقة ربحات فيها الدولة المغربية ودارت بقواعدها. الرباط ما حيداش السروال وراه الملك اتاصل بعباس واخا ما بانش لي علاش دارها ولحد الان مازال ما هدرش مع نتانياهو والكركرات اهم من القدس ومن فلسطين

واش المغرب دار صفقة فقضية اعتراف امريكا بمغربية الصحراء مقابل تطبيع مغربي اسرائيلي؟ اهاه. نقولوها بوجهنا احمر. واش فيها. واش كاين شي اتفاق شي اعتراف ديال دولة ماشي اي دولة. بل اقوى دولة فالعالم كيدار فابور. اللا. هادي هي السياسة خارجية كانت او داخلية.
غير المغرب بان دولة بصاح. دولة عندها اساس. عندها تاريخ. عندها تقاليد. دولة عريقة بصاح. اولا ما قبلش ان وزير خارجية امريكا مثلا يجي للرباط كيف كانو بغاو فاللول ونستقبلو عندنا نتانياهو ونعلنو على التطبيع. اللا. محمد السادس ديما كبير وكيعرف يلعب مزيان مع لكبار. ترامب وقع مرسوم رئاسي كيعتارف بمغربية الصحراء. وتسنى من 4 دجنبر الى 10 دجنبر باش هو اللي يتاصل بالملك ماشي العكس. هو اللي قال ليه عترفنا بمغربية الصحراء وفوقها السوريزا الزوينة فوق هاد الكادو وهي افتتاح قنصلية اميركية فالداخلة. واش يا لمغاربة عارفين اش هاد الشي كيعني. دولة مع اوباما كانت باغية تزيد مراقبة حقوق الانسان فعمل المينورسو الهيئة الاممية اللي مكلفة بمراقبة اطلاق النار فالصحرا٬ اليوم غادية تفتح قنصلية فالداخلة.
وفهاد الشي جا الجانب الثاني فالصفقة. اللي المغرب كان يقدر يديرو من مديتو لراسو: عودة فتح مكتب الاتصال. حقاش ماشي فتح مكتب بل عودة فتحو. المغرب كان فتحو وسدو فبداية عهد الملك الحالي بسباب داك الشي اللي وقع ففلسطين. دابا ماشي تطبيع تطبيع. عودة تطبيع ايلى بغينا نقولو. ثم كذلك بدء رحلات بين كازا وتلابيب. هادي مهممة بزاف. راه كاينة نص مليون اسرائيلي من اصول مغربية. عدد كبير وهدا وضع انساني. عاد كاينة امكانية فتح سفارات بين البلدين.
المغرب ما مزروبش. كلشي دايرو فوق نار هادئة. بشوية عليه. ايلى الادارة الامريكية مع الرئيس الجديد الديموقراطي جو بايدن٬ وهادا مستبعد٬ غدا قررات تغير موقفها من الصحرا٬ ممكن المغرب بسهولة يتراجع على الشق الثاني من الصفقة اي التطبيع مع اسرائيل
ايلى لاحظو واخا انا ضدو٬ محمد السادس اتصل بعباس محمود رئيس السلطة الفلسطينية بعد اتصالو برئيس امريكا. خبرو بكلشي. لحد الان مازال ما دار حتى اتصال رسمي بين المغرب واسرائيل. لا محمد السادس عيط لنتانياهو ولا شي حد اخر دارها. هنا كيبان ليك شحال من ورقة خدم بيها المغرب بذكاء. طبعا هاد الخدمة دارها القصر ماشي داك الوزير الغبي ناصر بوريطة المكلف بالخارجية. هاداك كون تبعناه هو دانا للحيط.
المغرب كون جا علي ما يتسوقش كاع لفلسطين. هي ورقة فيدو. انا مع فكرة ان المغرب عندو الكركرات هي المهمة. ما يمكنش نقبل كاع نحط الصحراء بمقام فلسطين كيف دار بيان الديوان الملكي. وجهة نظري الكركرات اولا واخيرا. لا قدس لا فلسطين تستحق نضحيو عليها ايلى كان تهديد للصحرا.