منع غبي. دابا اللي بدع اخراج اعتراف امريكا بمغربية الصحراء ما عندوش ناس يقولو ليه راه فصالح بلادنا نخليو اللي رافض التعبير يحتج ويغوت

البارح السلطات المحلية فالرباط منعات وقفة كانت غادية ديرها شخصيات معروفة بمواقفها ضد اي علاقة مع اسرائيل. السلطات منعات وقفة وقبلها ب24 ساعة سمحات بوقفة ما عارفينش حتى شكون نظمها تهز فيها الراية المغربية. مغاربة فرحانين بقرار اميركا الاعتراف بمغربية الصحراء.
حنا مازال فحالة الطوارئ الصحية. ولكن شفنا احداث وگنايز دارت ما فيها ادنى احترام لهاد الحالة الطوارئ الصحية. دار لقاء فالصحرا جاه شي 10 الاف مغربي ودار اخر فالمحبس واخر فالسمارة ومناطق اخرى. كلها كتخالف القانون. كلها تنظمها السلطات المحلية مع منتخبين.
اذن علاش البارح تمنعات وقفة كان من المشاركين فيها عبد الرحمان بنعمرو وسيون اسيدون. هاديك اللحظة باش كانو ماشيين فحالهم وصحافية كتسول اسيدون وجا قايد دفعها بطريقة مستفزة ضربة لبلادنا. راه المرسوم الرئاسي الامريكي اللي اعتارف بمغربية الصحراء ماشي شيك ابيض دير اللي بغيتي فالبلاد. ابدا واش تقبلها امريكا. راه المس بحقوق الانسان وحق المغربي فالتعبير عن مواقفو اساسي فاستمرار هاد الدعم.
بحال هاد التصرفات كنعطيو اللي نايضين فامريكا ضد قرار ترامب ولاخرين٬ ورقة يضربونا بيها. كيقولو ليهم وشوفو هادي بلاد ما قابلات حتى قل من مائة مغربي يعبر على رفضو لاقامة علاقة بين الرباط وتل ابيب.
كنا نربحو بزاف لو تم السماح للوقفة. واخا السلطات قالت البارح باللي ممنوعة وتغمض عينيها باش جاو ناس قلال. بل كانت توظفو وتقول هاد شحال من واحد رافض هاد الصفقة وطلعها مزيان عليهم.
اللي غريب ان بلادنا فيها عبقري دار هاد الصفقة وخلى اقوى دولة فالعالم تعتارف بمغربية الصحراء فيها كذلك غبي كيمنع وقفة سلمية ضد التطبيع وكيسمح لاخرى حقاش فيها العلم المغربي.
بغينا كاع القرارات اللي كتهم حرية التعبير وحرية الصحافة تبقى ديما مطبوعة بعقلية العبقري اللي دار الصفقة ماشي بالغبي اللي ضرب لبلاد فقضايا كثيرة وفابور بحال منع وقفة البارح