جا وقتو باش يمشي. بوريطة عندو مسؤولية كبيرة فهاد الشي اللي وقع فتونس . ما مسوقش لكاع السفارات وخلى اجتماع زامبيا يدوز وخلى الدولة الصديقة ترتابط بالجزائر والنتيجة: القطيعة

الجزائر الرابح الاكبر فهاد الازمة الديبلوماسية اللي وقعات بين المغرب وتونس. الجزائر بدات تحقق مشروعها اللي كانت قالو رئيسها فتونس بخصوص المشروع المغاربي بلا المغرب. راه خاصك تكون ساذج بزاف باش تعتاقد ان هاد الشي اللي وقع وغادي يوقع٬ صدفة. كلشي توجد ليه قبل.
الجزائر قوات حضورها لكبير من سنوات خاصة ففترة حكم قيس سعيد. مساعدات كثيرة وصلات ل300 مليون دولار سنويا واعانات فالمواد الاولية ومداخيل كثيرة فالسياحة. راه كيزور تونس سنويا جوجت المليون جزائري كيدوزو عطلتهم وكيخسرو بزافت لفلوس خاصة فالحمامات.
دابا هاداك وزير خارجيتنا ناصر بوريطة فين كان ناعس. اش دار باش يقوي المحور المغربي التونسي طيلة هاد المدة. شحال من مرة زار تونس وشحال من مرة دار اتصال هاتفي. خدمتو البسيطة ما دارهاش. اجهزتنا الاستخباراتية دايرة خدمتها وكتوصل المعلومة. ناس السفارة عاطينو كاع المعلومات.
بوريطة ولى مشكلة فالديبلوماسية عوض ما يكون حل. سولو السفراء المغاربة فالعالم واش كيدر عليهم ناصر بوريطة على مراسلاتهم ولا اللا. السي مول لمقص حاضي غير السفارات المهمة بحال باريس ولندن وواشنطن ووو وصافي.
الديبلوماسية المغربية فوضعية صعيبة. دولتنا محاصرة وتزادت حصار. كاينة ازمة صامتة مع فرانسا وباريس قوات علاقاتها مع الجزائر. اليوم تسالي زيارة رسمية لرئيسها ماكرون. زيارة دامت 3 ايام.
حتى فقضية تونس كاينة مسؤولية بوريطة. بيان الخارجية التونسية قال باللي الدعوة للبوليساريو دارت تنفيذا "لقرارات المجلس التنفيذي للاتحاد الإفريقي في اجتماعه المنعقد بلوزاكا بزمبيا يومي 14 و15 يوليوز 2022 -بحضور الوفد المغربي- حيث أكّد القرار على ضرورة دعوة كافة أعضاء الاتحاد الإفريقي للمشاركة في قمة تيكاد-8
اي كان ممثلين عن وزارة الخارجية وما عتارضوش.
اييه المغرب ما مقلقش على المشاركة ديال البوليساريو٬ بل مقلق على الاستقبال "الحار" اللي دارو رئيس تونس قيس سعيد لابراهيم غالي. هاد الرئيس التونسي ما مشات استقبل رؤساء دول افارقة ودارها مع شي 5 منهم ديال البوليساريو.
يعني ان تونس دازت لمرحلة فعلاقاتها مع الجزائر.
ما كناش نوصلو لهاد المرحلة كون كان عندنا وزير خارجية مزيان. بوريطة ولى عبء على الديبلوماسية المغربية. وصل الوقت يمشي فحالو. تبقىِ ديبلوماسيتنا قوية ولكن ذكية بزاف. استباقية عوض ما تكون انفعالية. راه بقات لينا غير موريتانيا اللي ما نوضناهاش معاها