التوانسة هجمو على سيدنا ف"هنبعل". صورو الملكية بحقارة: الرشوة والتحرش كتمشى بالميزاج. شكون اللي خلص باش يسبو مملكتنا وعلاش هاد التصرفات من توانسة. "كود" تقربات ليكم الصورة

هناء ابو علي وسعيد الشاوي ////
التوانسة كيضحكو على لمغاربة من خلال رئيس الدولة فهاد رمضان. صدفة ان هاد الضحك الباسل جا بعد اتصال دارو محمد السادس برئيسهم قيس سعيد البارح اول يوم فرمضان.
هاد الضحك دارتو شركة "بيك شوت" للانتاج اللي وجدات كاميرا خفية بعنوان "الملك" وجدها وقدمها صحافي معروف عنهم اسمو وليد الزبييي.
فاول حلقات هاد الكاميرا الخفية اهانات كثيرة للمغرب. طبعا كلشي كيبين باللي على المغرب على ملك المغرب. الدليل ان هاد الكاميرا الخفية اللي كيتجيب فنانة وتوهمهم انهم غاديين يشاركو فكاميرا خفية من خلال لقاءهم مع الملك٬ عطات لشي مغنية اسمها زازا سيناريو فغلافو كاريكاتور كان داروك لمحمد السادس فمجلة "بقشيش" اللي كانت تصدر من فرانسا.
جاو فالهدرة كيهدرو على ملك عندو ولي العهد فعمرو 16 العام. باينة ولي العهد مولاي الحسن.
لكن فين كاينة الاساءة بالضبط. فالافكار اللي كيدوزوها فالبرنامج اللي ماشي خفيف ولا ممتع فاولى حلقاتو. الملك كيبوسو ليه اليد. كاين تحرش فالقصر. كاين ولي العهد كيلوح الضيوف اللي ما كيعجبوهش فالغنا. كلشي فيه رشوة. بوس اليد بثمن اللوحة فالبيسين بثمن. يعني كلشي سلبي بزاف
دابا هاد الحلقات الاولى ما دارتش مشاهدات بزاف.
هاد الشي ديال تونس وضربو لمؤسسة مركزية فالنظام المغربي هي الملكية ماشي فابور. ماشي مجاني. هما نيت فالبرنامج كيهدرو على كلشي عندو سيناريو. يعني فكرو فكل التفاصيل. واعيين بكل الاحداث. عبارة ان هاد "البرنامج ترفيهي لا يحمل اية خلفية سياسية" كذوب. بالعكس عبارة كتبين باللي كلشي فكرو فيه. ثم زادو "الاراء والمواقف التي يعبر عنها ضيوف البرنامج لا تمثل سوى اصحابها" هادي غير طريقة من البرنامج باش يدوز رسائلو او رسائل اللي خدام معاهم. منشط البرنامج دار وغيدير حيل كثيرة باش يدوز هاد الرسائل.
علاش هاد القناة دارت هاد الاساءة للمغرب ولمؤسسة الملكية؟ هاد الشي فيه امور متداخلة وفق خبير فالعلاقات المغربية التونسية ل"كود". الخبير قال ل"كود" باللي هاد الشي ماشي جديد٬ غير باتباع برامج القنوات التونسية وحتى اراء سياسييها وبرامجهم الانتخابية ديما حاضر المغرب. باحث اخر اكد ل"كود" باللي المغرب حاضر فتونس وباللي مشاعر التوانسة متداخلة مركبة اتجاهو "كاين المغرب النموذج وكاين المغرب المنافس وكاين المغرب المثير للاعجاب وكاين المغرب اللي استغل ثورتهم باش يحقق نتائج اقتصادية مزيانة…" هاد الشي علاش٬ يحكي مصدر "كود"٬ مرة مرة كتخرج مشاعر العداء والحقد بحال اللي وقع بعد ماتش الوداد البيضاوي ضد الترجي التونسي فنهائي كأس عصبة الاندية الافريقية هادي عام
دابا هاد الشي اللي دارتو القناة ماشي مجاني. اكيد وراء جهات واش غير تونسية ولا داخلة جهات اخرى. الاعلام التونسي فيه الوطني اللي وارث فكر بورقيبة. عندو اعتزاز بتاريخ هاد البلد وفيه بانو مرتزقة. هاد الفئة الاخيرة ولات ساحة حرب بين دول الخليج وبين دول الجوار. فيه فلوس الامارات وفلوس قطر وفلوس تركيا وفلوس ليبيا وفلوس الجزائر… هادو فيهم اللي باغي يصفي حساباتو مع المغرب. لقى مرتزقة قادرين يديرو الخدمة وبمقابل بسيط. هاد الشي.
الكاميرا الخفية غادية دير ازمة ممكن تكون سياسية بين تونس والمغرب وخايبة مع هاد الدولة. نتفرجو ونتسناو