الحكومة فأول تعليق على قضية الإمام المغربي المتطرف إيكويوسن.. بايتاس ل"كود": هادشي يناقش فإطار الاتفاقيات القنصلية بين الدول ماشي فالاعلام

فأول رد فعل على الجدل الاعلامي على الامام المتطرف حسن إيكويوسن، اللي قررت فرنسا ترحلو للمغرب، قال مصطفى بايتاس، الناطق الرسمي باسم الحكومة، بلي بحال هاد الامور لا تناقش في الاعلام وعندها قنواتها الدبلوماسية المؤطرة بالاتفاقيات القنصلية بين الدول.
وقال بايتاس، خلال الندوة الصحافية التي أعقبت لقاء المجلس الحكومي المنعقد صباح اليوم الخميس، إن :"هادشي يناقش في اطار الشراكات والاتفاقيات القنصلية التي تربط بين الدول".
وكان مصدر "كود"٬ أكد بلي قبل ما ياخد هاد الامام الباس كوسولير من المغرب خاص السلطات الفرنسية توقفو ومن بعد تقدمو للقنصلية المغربية وباش تتأكد هاد القنصلية باللي مغربي راه ياخد ورقة يمكن بيها يدخل لبلادو. اما الهدرة على هاد الوثيقة بلا حتى ما يعرفو فين كاين دابا هاد الامام راه غير مزايدة وصافي" يضيف مصدر "كود".
يعني ان المغرب فاللول وافق موافقة مبدئية على باش يعطيه "باس كونسولير" حقاش يستحيل يعطي ورقة لفرنسا وهي خاصها تعطي للمعني بالامر باش يكون حاضر يؤكد مصدر "كود".
يشار بلي الامام مزال ملقاتوش فرنسا، وملي تلقاه ديك ساعة ممكن نهضرو على عملية الترحيل.