لعاب فالبطولة فتح على القلب ولاصيرونس رفضت تعوضو فمصاريف العملية

خضع سليمان الدريوش اللعاب ديال المغرب التطواني لعملية جراحية على مستوى شرايين القلب في إحدى المصحات الخاصة فكازا، حيث كللت هذه العملية بالنجاح.
الحالة ديال المدافع التطواني سليمان الدرويش مستقرة ومن المنتظر يخرج من المصحة اليوم الأربعاء فالعشية، مع العلم أن شركة التأمين رفضت تدفع تعويض مصاريف العملية اللي دار سليمان الدرويش حسب الفريق ديالو المغرب التطواني، بداعي أن سبب إجراءها هو تشوه خلقي ماشي إصابة، الأمر اللي جعل المكتب المديري ديال النادي برئاسة رضوان الغازي يتكلف بمصاريف عملية اللعاب سليمان.
وكانت الفحوصات الطبية اللي خضعو لها اللعابا ديال المغرب التطواني في بداية الموسم بمركب محمد السادس لكرة القدم بالمعمورة، كشفت عدم توازن دقات قلب اللاعب سليمان الدريوش، وتبين بعد الكشف الدقيق عليه أن شي واحد من شرايين القلب ديالو ملتصق ببعضو البعض ويستوجب عملية جراحية لإعادة التوازن لدقات قلبو.