بونو تألق مع إشبيلية ضد سوسيداد وخا خسرات والنصيري لعب وقدم مستوى مزيان

تألق الدولي المغربي ياسين بونو فالماتش اللي لعب مع فرقتو إشبيلية ضد ريال سوسيداد فبطولة الصبليون اليوم الأربعاء، وهو الماتش اللي شارك فيه حتى المغربي الأخير يوسف النصيري وقدم مستوى مزيان.
وخا خسرات إشبيلية بنتيجة 2 بيوتا لواحد، تألق ياسين بونو ومنع بزاف ديال لبيوتا اللي كان غادي يماركيهم ريال سوسيداد على الفريق الأندلس، خصوصا وأن إشبيلية كمل الماتش بنقص عددي ومن الدقيقة 34 و هو كيلعب غير 9 اللعاب من بعدما طرد الحكم كل من راكيتيتش وتوريس.
الماتش كذلك عرف المشاركة ديال الدولي المغربي الآخر يوسف النصيري واللي دخل كبديل فالجولة الثانية، وقدم مردود تكتيكي مزيان وكان كيرجع يدافع مع الزملاء ديالو على مرماهم ملي كتكون الكرة عند اللعابا ديال ريال سوسيداد، أما هجوميا راه كان قريب يماركي التعادل لاشبيلة من واحد الضربة رأسية مخدومة دازت من حدا لبوطو ديال سوسيداد.
وكيجي أداء كل من ياسين بونو ويوسف النصيري مع إشبيلية فهاذ الماتش، باش يخلي الجمهور المغربي يطمئن على مرمى المنتخب الوطني المغربي وقلب الهجوم ديالو قبل كأس العالم بأيام، فانتظار يعلن الناخب الوطني وليد الركراكي غدا الخميس على اللائحة اللي غادي تشارك فالمونديال وللي غادي يكون فيها ياسين بونو ويوسف النصيري.