مسكين حارث كان غادي يلبس ال10.. ها أرقام اللعابا ديال المغرب فكأس العالم

مازال ما تغيرش الاسم ديال الدولي المغربي أمين حارث فالائحة ديال المنتخب الوطني المغربي اللي غادي تلعب كوب ديموند بلعاب أخر، مع العلم أن اللائحة الرسمية خرجات ومازال كيتواجد فيها الاسم ديال حارث بالرقم 10 اللي كان غادي يلبس فظهرو فالبطولة.
ومن المنتظر يحمل أي لعاب غادي يعيط له وليد الركراكي فبلاصة أمين حارث الرقم 10، وطبعا الناخب الوطني عندو مهلة حتى 24 ساعة قبل بداية ماتش المنتخب الوطني المغربي ضد كرواتيا باش يبدل أي لعاب فالائحة بلعاب آخر، وهي المدة اللي محددها الفيفا لأي منتخب باش يبدل فاللائحة النهائية يعني قبل من 24 ساعة بداية أول ماتش فالبطولة .
وبخصوص أرقام اللعابا ديال المنتخب الوطني المغربي فكأس العالم فإلى جانب أمين حارث واللي كان غادي يلبس الرقم 10 ودابا غادي يلبوس اللعاب اللي غادي يعوضو، فياسين بونو الرقم 1، أشرف حكيمي رقم 2، نصير مزراوي رقم 3، سفيان أمرابط رقم 4، نايف أڭرد رقم 5، رومان سايس رقم 6، حكيم زياش رقم 7، عز الدين أوناحي رقم 8، عبد الرزاق حمد الله رقم 9، عبد الحميد الصابيري رقم 11.
باقي اللائحة فيها منير المحمدي رقم 12، إلياس الشاعير رقم 13، زكرياء أبوخلال رقم 14، سليم أملاح رقم 15، عبد الصمد الزلزولي رقم 16، سفيان بوفال رقم 17، جواد ياميق رقم 18، يوسف النصيري رقم 19، أشرف داري رقم 20، وليد شديرة رقم 21، رضا التكناوتي رقم 22، بلال الخنوس رقم 23، بدر بانون رقم 24، يحيى عطية الله رقم 25، يحيى جبران رقم 26.