كرواتيا خصم المغرب فالمونديال تحرجت مع السعودية وربحاتها بالشمتة

ربحت كرواتيا الخصم الأول للمغرب فكأس العالم قطر 2022، (ربحت) بالشمتة المنتخب السعودي اليوم الأربعاء فماتش أميكال فالسعودية.
ودخل المنتخب الكرواتي الماتش ضد السعودية بتشكيلة فيها الاحتياطيين وما لعبش بالركائز ديالو من الأول، وكان المنتخب السعودي هو اللي مسيطر فالشوط الأول أمام الكرواتيين رجعو الخلف وبقاو كيدافعو، والسواعدة كيزكلو.
السعودية اللي كيدربها الناخب الوطني السابق هيرفي رونار فالشوط الثاني بقات ضاغطة على كرواتيا وخا المدرب ديالها دخل مودريتش وكوفاسيتش، لكن بقاو السواعدة بقاو كيزكلو،، فالوقت اللي غادي ينجح المنتخب الكرواتي فتسجيل هدف على غفلة فالدقيقة 82، بواسطة كاراماريتش، وسالا الماتش بواحد لزيرو.
وغادي يلعب المنتخب الكرواتي الثلاثاء الجاي ضد المغرب فأول ماتش ديال المنتخبين فكأس العالم فالمجموعة 6 وهو ماتش مهم بزاف للأسود حيث الرباح فيه هو مفتاح التأهل للدور الثاني.