كريستيانو رونالدو طلع له الدم وبغى يهز صاكو ويخلي البرتغال قبل ماتش المغرب

كيعيش منتخب البرتغال خصم المغرب فربع نهائي كأس العالم قطر 2022 جو مضطرب حسب تقارير إعلامية، وهادشي بسبب النجم ديالو كريستيانو رونالدو اللي هدد باش يهز صاكو ويرحل، حيث ما دخلش رسمي فثمن النهائي ضد سويسرا.
وكشفت جريدة "ديلي مييل" البريطانية أن كريستيانو رونالدو هدد المدرب ديال البرتغال فيرناندو سانتوس بمغادرة معسكر المنتخب فقطر، وهادشي من بعدما خلاه جالس فالاحتياط فماتش سويسرا.
وأكد المصدر نفسو، بلي من بعدما سالا الماتش ديال منتخب البرتغال وسويسرا، تكلم رونالدو مع المدرب فيرناندو سانتوس وعبر له على عدم رضاه بالجلوس فالاحتياط، وهددو بلي غادي يهز صاكو ويمشي بحالو.
وأكدت الجريدة بلي رونالدو متأثر بداكشي اللي عاشو مع فرقتو مانشيستر يونايتيد مؤخرا، وبلي السلوك ديالو تبدل بهاد المشاكل، مع العلم أن النجم البرتغالي فالماتش الماضي ديال منتخب بلادو ضد سويسرا فثمن نهائي المونديال، ما دخل حتى الدقيقة 74 وكانت البرتغال حسمت المباراة اللي ربحتها بنتيجة 6 لواحد وهو ما سجلش.
واللي كيزيد يأكد بلي كريستيانو رونالدو ما راضيش على الوضع ديالو مع منتخب البرتغال، هو أنه البارح فالحصة التدريبية الأولى من بعد الماتش ضد سويسرا تدرب مع 11 لعابا اللي لعبو المباراة، ماشي فالتداريب مع اللعابا الاحتياطيين، وهادشي كان استثنائي حيث العادي هو يتدرب مع اللعابا اللي دخلو كاحتياطيين فالماتش واللي ما لعبوش حيث شارك فالمواحهة كبديل.
وغادي يكون المنتخب البرتغالي هو الخصم ديال المنتخب الوطني المغربي فربع نهائي كأس العالم قطر 2022، السبت الجاي فتيران الثمامة فالعاصمة القطرية الدوحة فالماتش اللي غادي يبدا مع 4 لعشية بالتوقيت ديال المغرب.