ها شنو قال رونالدو على التهديد ديالو بترك منتخب البرتغال قبل ماتش المغرب

خرج الدولي البرتغالي كريستيانو رونالدو باش يكالمي الجمهور البرتغالي اللي متخوف من الأخبار اللي كتروج حول أن الكابيتان ديال منتخب بلادو داير المشاكل وسط المعسكر فالمونديال بقطر، وباغي يمشي بحالو قبل الماتش ضد المنتخب الوطني المغربي السبت الجاي فربع نهائي كأس العالم 2022.
كريستيانو رونالدو تكلم مع البرتغاليين وبغى يزيد يأكد النفي ديال الإتحاد البرتغالي لكرة القدم الأخبار اللي قالت هاد الصباح، أن ولد ماديرا مقلق من المدرب وهدد بلي غادي يهز صاكو ويزيد حيث ما لعبش ضد سويسرا رسمي وبرك فالاحتياط.
ونشر ،رونالدو هو أحسن لعاب فتاريخ البرتغال و واحد من أساطير كرة القدم فالعالم، (نشر) فتويتر صورة له وهو لابس توني ديال الاحتياط وغادي كيجري باش يشارك صحابو اللي رسميين فمنتخب البرتغال فرحة تسجيل هدف فمرمى سويسرا، وقال عليها: "مجموعة متماسكة ما يمكنش تفكك بقوة خارجية، أمة شجاعة ما يمكنش يخوفها ش خصم، فريق حقيقي بمعنى الكلمة غادي يقتل على قبل الحلم حتى النهاية".
للإشارة فالمنتخب الوطني المغربي غادي يلعب ضد البرتغال فربع نهائي كأس العالم قطر 2022، السبت الجاي فتيران الثمامة فالعاصمة القطرية الدوحة مع 4 ديال لعشية بالتوقيت المغربي.