الركراكي: ها الفرق بيني وبين خاليلوزيتش وها علاش نجحت مع المنتخب فالمونديال

شكر الناخب الوطني وليد الركراكي البوسني وحيد خاليلوزيتش اللي سبقو فتدريب المنتخب الوطني المغربي على العمل اللي قدمو فليكيب ناسيونال، وعبر على احترامو للطريقة كيفاش كان كيشتغل وكشف الأشياء اللي خلاتو هو مختلف وكان عندها دور فالانحاز اللي تحقق فكأس العالم 2022.
وعبر وليد الركراكي على الشكر والاحترام لوحيد خاليلوزيتش وقال فحوار مع قناة "الرياضية": "برافو لوحيد خاليلوزيتش وشكرا له، تأهلنا معه ومع الكروب اللي جمع هو وبالعقلية ديالو دار الخدمة اللي كان خاصو يدير وعلى قبل هاد شي جا هو المنتخب المغربي فريق كبير واللي كيجي له خاصو يعطي الإضافة وكان داير كأس العالم من الأهداف ديالو فحالي انا دابا داير كوب دافريك هدف ديالي وخاصني نوصل لدومي فينال ديالو والى مادرتش هادشي غادي نمشي بحالي ووكنشكرو".
وبخصوص وصفة النجاح ديالو مع المنتخب الوطني المغربي فكأس العالم قال وليد الركراكي: "أنا جيت للمنتخب بالعقلية ديالي وبالاسلوب ديالي ممكن الفرقة اللي كانت مع وحيد خاليوزيتش ما كانتش فيها 50% من اللعابا اللي مشاو لكوب ديموند فحال زياس ومزراوي وصبيري وحمد لله وخنوس وزيد وزيد وكان خاصني نجمع ما بينهم وما بين اللي كانوا، والمهم هم اللاعبين ماشي المدرب حيث هم اللي عطاو الاضافة وكانت عندهم الرغبة وتقاتلو وانا فرحان بهم، ويمكن الروح الوطنية وتمغرابيت هي اللي كان خاص اللي يعطيها لهم ويكون مدرب مغربي باش يموتو على التوني هادشي اللي وقع".