وداديين غاضبين من "كازا إيفنت" بسبب تذاكر الحمرا مع الماض

عبرت جماهير الوداد الرياضي اللي ساكنة خارج كازا أو اللي ما عندهاش وقت باستثناء أنها تجي للتيران يوم الماتش ديال الفريق مع المغرب الفاسي غدا الأربعاء، على غضبها بسبب عملية بيع وتسليم تذاكر المباراة.
ومقابل الارتياح اللي عبرت عليه الجماهير الودادية، حيث رئيس النادي سعيد الناصيري، خلا الاستقرار فثمن بيع تذاكر الحمرا ومتزادش على 30 درهم بالنسبة للمدرجات المكشوفة، فعدد من الوداديين غاضبين من شركة "كازا إيفنت" بسبب تنظيم عملية بيع التيكي.
بزاف من الوداديين اللي ساكنين خارج مدينة الدار البيضاء ما عجبهومش أن "كازا إيفنت" تحبس عملية بيع وتسليم التذاكر غدا الثلاثاء، حيث ما عندهمش الوقت اللي يهبطو فيه حتى لكازا من غير أنهم يجيو لها نهار الماتش كيف كيديرو ديما كيقطعو التيكي ونهار الماتش كيجيو لكازا كيتسلموه من النقاط اللي مخصصها الشركة لذلك وكيدخلو للتيران.
وطالبو الوداديين اللي ساكنين خارج كازا على مواقع التواصل الاجتماعي، شركة "كازا إيفنت" أنها تلقا لهم حلول واقعية، ماشي غير تجي وتخرج قرار فحال كيفما دارت ملي منعت تسليم التذاكر يوم الماتش لدواعي تنظيمية حسب ما قالت، وحددت اليوم الثلاثاء كأخر أجل لتسليم التيكي، وأنه إن أرادت تطبيق هاد القضية خاصها تدير لهم حتى هما نقاط فالمدن اللي ساكنين فيها وماشي النقاط ديال تسليم التذاكر يكونو غير فالدار البيضاء.