تعيينات اللجان كتجر على البدراوي غضب المنخرطين ديال الرجاء وبرلمان النادي كيغلي

كيعيش برلمان الرجاء الرياضي حالة غليان تسبب فيها رئيس الفريق عزيز البدراوي، والاختيارات اللي قام بها فتعيين اللجان اللي غتسير النادي خلال المرحلة المقبلة.
عدد كبير من المنخرطين فالرجاء الرياضي عبروا عن استياءهم من اختيارات عزيز البدراوي والأسماء اللي اختارها باش تسير اللجان، واستغربوا من تواجد عدد من الأشخاص فيها، وهادشي نظرا لعدم توفرهم على التجربة اللازمة وما عارفنيش النادي مزيان مقارنة بالأشخاص اللي كانوا مرشحين وكان كيفاوضهم ورفضوا يدخلو معه للجان والمكتب المديري حيث ما بغاوش يكونوا أعضاء بالصفة والاسم وبدون ممارسة فالواقع، وحتى ضبابية مستقبل الرجاء مع البدراوي خلاتهم يتراجعو ويرفضو يحطو يدهم معه.
برلمان الرجاء الرياضي وحسب مصادر مطلعة، كان معول أن عزيز البدراوي يوصل لحل مع عدد من المنخرطين اللي عندهم كلمتهم وسط النادي واللي دخل معهم فمفاوضات منذ مدة باش يدخلو معه للمكتب المديري، ولكن ما وصلش معهم لاتفاق وهم ما بغاوش يكونوا درع حماية له من انتقادات باقي المنخرطين ورفضهم الانضمام له خلاه يعين اسماء أخرى أغلبها كيعرفها غير هو، وهادشي تسبب فغضب وسط المنخرطين ديال النادي اللي زادو تقلقو عليه بسبب الاختيارات الفاشلة ديالو نفس جا وايضا التسيير الانفرادي ديالو اللي دخل الفريق فمشاكل كثيرة ملي طلع رئيس.
للإشارة وحسب نفس المصادر، فمن بين الأسماء اللي اختارها عزيز البدراوي رئيس الرجاء الرياضي لتسيير النادي كاين عبد اللطيف خير شقيق الممثلة فاطمة خير مرات الممثل سعد التسولي الناطق الرسمي الحالي ديال النادي، وكذلك عين على رأس واحد اللجنة بالرغم من أن طلب الانخراط ديالها مازال ما تم المصادقة عليه، حيث فالجمع العام فين كتم المصادقة على انخراط شخص جديد من طرف المنخرطين فالنادي أو التشطيب على منخرط.