كاريدو فرحان فالوداد واللاعبين رحبو به وكيواعد الجماهير الودادية بالانتصارات والألقاب

عبر الإسباني خوان كارلوس كاريدو المدرب الجديد للوداد الرياضي على الفرحة ديالو بالعودة للاشتغال مع الفريق الأحمر، بعدما تعاقد معه رئيس النادي سعيد الناصيري باش يدرب الواك خلفا للتونسي المهدي النفتي.
وأكد كارلوس كاريدو فتصريح على الصفحة الرسمية للوداد الرياضي أنه فرحان بزاف وكيفتخر بالعودة ديالو إلى الوداد الرياضي وشكر المكونات ديال النادي اللي رحبت به، وقدم وعد للوداديين أنه غيدير كل ما فجهدو باش الحمرا تحقق الانتصارات والألقاب معه.
كارلوس كاريدو بدا الخدمة ديالو مع الوداد الرياضي اليوم الأحد، وكيفما ذكر موقع "كود" فوقت سابق فالمدرب الإسباني كان حاضر للإشراف على الحصة التدريبية ديالو هاد العشية، وكان معه المساعد ديالو عبد الإله صابر، ورحبو اللاعبين بزاف بالمدرب الجديد وكانوا فرحانين بلقائهم الأول معه.