بعد البطولة.. البدراوي غايضيع على الرجاء حتى عصبة الأبطال حيث ماتش الأهلي قرب واللاعبين بدون مستحقات

صبحات الشكوك كتحوم حول قدرة الرجاء الرياضي على تخطي الأهلي المصري في ربع نهائي عصبة أبطال إفريقيا والتأهل إلى نصف النهائي، من بعد ما تألق الفريق في دور ليكروب وتعتبر واحد من أبرز المرشحين للتتويج بهذه النسخة، لكن كولشي صبح مهدد أنه يتضرب في الزيرو وهذا بسبب عجز عزيز البدراوي رئيس النادي على التدبير الجيد للفريق.
مصادر مطلعة، كشفت أنه كاين غليان وسط اللاعبين ديال الرجاء، حيث ما لقاوش حل مع عزيز البدراوي رئيس النادي باش يصرف لهم المستحقات ديالهم اللي كيتسالو، وأن البدراوي عاجز إلى الآن على توفير سيولة مالية يؤدي بها ولو جزء من فلوس اللاعبين.
نفس المصارد، كتشوف أن هذه الأزمة ممكن تأثر بشكل كبير وسلبي على الرجاء الرياضي قبل ما يلعب مع الأهلي المصري، حيث ما يمكنش الطاقم التقني واللاعبين يزيدوا يركزوا على ماتش آخر د الكرة وهم ما كيتوصلوش بالمستحقات ديالهم لأشهر، وهذا قد يتسبب في إقصاء الفريق اللي كانت عليه آمال كبيرة أنه يمشي بعيد هذا الموسم فعصبة أبطال إفريقيا.
وكاين تدمر كبير وسط لاعبي الرجاء الرياضي بسبب الوعود ديال رئيس النادي عزيز البدراوي اللي ما وفاش بها، واللاعبين محتاجين مستحقاتهم حيث حتى هم عندهم التزامات والغليان اللي كاين وسط الجمهور هو اللي كاين داخل الفريق، وكيفما الجماهير فقدت الثقة في البدراوي راه حتى اللاعبين فقدوها فيه وكلشي كيتسنى التغيير والرحيل ديالو في أقرب وقت ولكن بشكل عاجل، حيث كل تأخير يقدر يتسبب في تبخر آمال الرجاء في المنافسة على عصبة أبطال إفريقيا حيث ماتش الأهلي المصري قرب، وهذا الشي من بعدما ضاعت البطولة الاحترافية بسبب التسيير العشوائي ديال البدراوي.