واش يستهلو هاد التكرفيص اللي دارلهم البدراوي؟ الرجاء شدو الطريق راجعين فرحلة شاقة من تنزانيا إلى المغرب

شدات بعثة الرجاء الرياضي صباح اليوم الأحد الطريق من تنزانيا راجعة إلى المغرب من بعدما ربح الفريق الأخضر المضيف ديالو سيمبا التنزاني البارح السبت فدار السلام، بالأداء وبنتيجة 3 لزيرو فالجولة 2 من ليكروب ديال عصبة أبطال إفريقيا لكرة القدم.
وانطلقت بعثة الرجاء الرياضي فطريق العودة إلى المغرب وغتكون عندها رحلة شاقة أخرى، حيث طريقها ما غاديش تكون نيشان، وخذات البعثة الطائرة من دار السلام وراه دابا غاديا إلى العاصمة القطرية الدوحة وفالمطار ديال حمد الدولي غيكون على الفريق ينتظر شي 7 السوايع تقريبا، وهو كيتسنى الطائرة اللي غتجيبو إلى المغرب وغيوصل تقريبا غدا الاثنين.
هذه الرحلة الشاقة ديال الرجاء الرياضي كتوضع عزيز البدراوي رئيس النادي فموقف صعيب ومحرج قدام المنخرطين فالخضرا والجماهير الرجاوية، خصوصا وأن الفريق حقق انتصار على سيمبا بالأداء والنتيجة وعزز صدارتو فلكروب 3، ولكن الديبلاصمون هو النقطة السوداء، حيث الخضرا مشات مسخسخة لتنزاتيا فرحلة غير مباشرة وغترجع مسخسخة وبنفس الطريقة، لأن البدراوي عجز يوفر للفريق طائرة خاصة تديه وتجيبو نيشان، مع العلم أن الرجاء كتسناهم مباراة الأربعاء المقبل مع التواركة فالبطولة وهادشي يقدر يؤثر على النتيجة فهاد الماتش.