«القضية فيها شي حاجة».. هكذا يهاجم أصحاب نظرية «مالك مزغب» إبنة بنكيران

هوية بريس – الأربعاء 29 يونيو 2016
* رئيس الحكومة وظف ابنته إلى جانبه في الأمانة العامة للحكومة
– الأمانة العامة للحكومة هي وزارة على رأسها الوزير الضحاك
* إذن بنكيران أمر الضحاك لي معاه فالحزب باش يوظفلو بنتو
– الضحاك وزير مستقل محسوب على القصر لبا علاقة له بالبيجيدي ويرأس الوزارة منذ سنواااات
* المهم بنكيران طلب منو يوظف لو بنتو
– سمية بنكيران اجتازت المباراة ونجحت في الامتحان الكتابي والشفوي
* ولكن هاد المباراة راه رئيس الحكومة لي وصلها خبارها حيت هاد شي ما كيوصلش لولاد الشعب
– المباراة أعلن عنها على موقع الوزارة وفي كل المواقع المهتمة بمباريات التوظيف في المغرب بحال وظيفة وبحال ماروك اومبلوا
* ولكن ماشي اخلاقي يكون باك رئيس الحكومة وتمشي تدوز مباراة وتنجح فيها، والمغرب عامر بالكفاءات
– البنت عندها ماستر فالقانون وماستر ثاني فالدراسات الإسلامية
* وعلاش باباها كينصح المعطلين يمشيو للتجارة وهي مشات للوظيفة
– سنوات والبنت كتبريكولي فأعمال بسيطة باش كتدبر حياتها، ودابا جات فرصة تقدمت ونجحت
* وعلاش بنكيران كيقول الوظيفة اضيق ابواب الرزق وكيقول للمعطلين، دابا وساع هاد الباب
– بنكيران كيقول الدولة ما غتخدمشي كلشي وكيقول لحاملي الشواهد يتقدمو للمباريات ويدخلو بكفاءتهم، والمباريات ماعمرها توقفت، ديما كاينة وديما كينجحو ولاد الشعب وكيتوظفو
* ولكن هاد المنصب باااينة غادي تشد فيه الملايين
– المنصب هو متصرف من الدرجة الثانية، يعني جهدها 8000 درهم
* وراه ماشي غير بوحدها كاينين ناس آخرين من الحزب ديالهم، واش ما شفتيش الصورة لي كدور؟
– الصورة كذب على الناس لي فيها، ولي لا علاقة لهم بالصفات لي عطاوهم، ومجرد اختلاق
* المهم القضية فيها شي حاجة
– بصح ملي ولات بنت رئيس الحكومة كتدوز المباراة فحال عباد الله باش تخدم بأجر متوسط راه فعلا "شي حااااااجة"