الحلمه ف الما..

ما هرقت حروف
ما فاض بحر
ما تفتح دماغ
ما نبت شجر
ما تهرس راسي
تقل يكن حجر
السما حاجبة
مافتحت دفوف
هذ العين ولفت البكى
القلب ولف الشكى
انا بين وبين
بين التهراس والوقوف
قاضي بالعيش...
مقزز
راضي بالزز
بين المحبة والخوف
نساين نعاين
نساين حملي يخفاف
نساين نتلحاف
بالبيض الناصع نصوع
نبوس تراب رجل التراب
عل الله تشعل حروفي
راه يلا شعلت
ريحها يتبعو لعجاج
ويلا قصدت
سهم
ما يتحرف مايعواج
نبل
ولاخدمت سراب النمل
العين فاقت عل سكت وشوف
دخل سوق راسك
قلت ندخل سوق الحروف
الخوف يلوح بخرقة بيضا
وانا
عياني الوقوف
كنت بين وبين
مانا واقف مانا كالس
مانا ممدود
مانا ناعس
العين
فاقت على الكذوب
ونعست على الكذوب
قرت فكراس المكتوب
نطق مول الفال:
شعل لوقيد
وخلي التران يزيد
السفينة هاربة بنا
فايقين ناعسين
حالين عينينا
كب ليا كوب
واللي بغا يسيس
فزيت الحكمة
فقدرة المجدوب
مانا كناوي مانا هداوي
صدفتني الحملة ف الما
عاشق حواجب الزحمة.
سعداتك يافاعل الخير
سعداتك ياطارز الحروف
بمخيط الحروف
قصيدة حية
فهامة ملوية
جلابة للعريان
سترة للسعيان
شبكة بلبكة
بالتخمام
دافن السر تحت الجلدة والعضام
الكلام يلاخرج بلا وجاع
كسدة بلاروح
فروج مدبوح
مايقاقي
ما جايب خبار زناقي
صوت مبحوح
يلا تبورشت العروق
من بعيد رحتها تفوح
سعداتك يافاعل الخير
سعداتك ياغازل الحروف
قصيدة حية بعيونها تشوف
فهامة ملوية
سرها متلوف
كربة شانها شان
بلغة للحفيان
بزولة بقرة رغوتة
للعطشان
الحرف الشاعل
منارة
يتقشع من بعيد
والطافي خسارة
ما يغني مايفيد
الحرف يلا شعل
يبان يبان
تحت الحجر تحت لحديد
فجنب المعمرة
فباب المسيد
طالب مسكون
واقف حسكة
ماسح بالشوك
مصفي السلكة
ناضي...ماضي
راكع...راضي
فاهم...نادم
مخدوم...خادم
شاعل...طافي
متبك...العوافي
عجاجو يشطب الطريق
مايخلي غمة مايخلي ضيق
اللي ماقرا مايكتب
اللي ماورت مايكسب
واللي فلت من ثقبة الغربال
كيف المحال ياقلبي كيف المحال
شدتني الرعشة بالدهشة
بيتتني بلا عشى
معمرني شفت الروح
مسلولة من الروح
قصيدة واقفة معرشة
رطبة محرشة
ما حضرت لعرس اللام والجيم
ولا سيست من دواية الحكيم
كنت دايز وسولت مول الفال
قال:
سطر قبل ماترحل
التاريخ تران
مايرحم مايحن
حلوف
فغابة متلوف
عور مكفوف
من غير قدامو مايشوف
مايكلم غير اللي يكلمو
ما يعلم غير اللي يعلمو
وقف معاه صحيع
وشعل حروفك عندك تطيح