حولي تلعيد...نصائح وتوضيحات من فلاح كساب وشناق

أنا فلاح (كساب وشناق) كنقوليكم لغنم ديال لكسيبة راها دايرا التمان وهادشي مزال مابدا وقت تشناق حتى ل 10 أيام الأخيرة واجي تفرجو فلغلا ديال بصح
أعطيكم الأسباب ونوضح ليكم
أولا بالنسبة للكسيبة فهي دايرا التمن نعطيكم مثال أنا شريت 30 راس هاذي 5 أشهر من خريبكة جبتها لبروج تقامت عليا ب 2600 درهم من ديك لوقت
وهي كتعلف أمانكولكومش لعلف شحال داير كتقام علية ب 1000 درهم فسيمانا أزعما راه مدعم من الدولة ههههههه
أرغم ذلك سلعة ديال لكوارا عندها ماليها واخا غاليا كتباع هي لولا أبتمان من 3000 حتى 4500 ولكن لحولي نيت سنان لحليب ألكبير فيهم تني عاندو عامين
أما تشناقت كتبدا منين كيتباعو لحوالا دلكسيبة يعني 10 أيام قبل لعيد دك ساعا مكاين لحنين لارحيم كولي تيليفونات لي خداما ولكاميو ماكيوش لابليل لنهار ،أصغر عامل غير كيبقا شاد لحولي فكاميو كيكاجي معاك ب 5000 درهم غير 10 أيام ولكاميو 10000 درهم إوا الشناق إلى مكانش مكدر راه مايسلكش ، والخطير فلغنم ديال تشناق هي الشاكل ليفيها مامعروفاش أصلها واش واكلا كنتجي ل إفريقيا ولا لبرنوصي ولا لمحمدية تباع تباع تقدر تجيب حولي شارف من حد ولاد جلول أولا خميس الرميلا غير ب 2000 درهم قد لحمار وكرونو فيهم ميترو وتبيعو فالدار البيضا ب 4000 درهم حيت بيضاوا خصهم غير إعمر لعين كدام الجيران أهو لحمو والله لاطاب ، أعاوتاني ماكاينش لكيبغي إعند فالشاوية بالحولية كيشريها لشناق ب 700 درهم ويديها للغرب حيت كيحماقو عليها وبيعوها ب 1800 ألا 2000 درهم إذن الشناق حافض السواق أكخسر فلوس صحيحة باش إجمعها صحيحة راه كاين لكيكلس العام كامل أكيخدم غير 10 أيام فلعام
لحاصول كولشي واكل الدق لكساب قاهرو العلف كيبيع بالثمن أعنو لمليح أكليانو كيجيو إخلصوه ويبقا فلكوري حتى نهار لعيد وجيليه مولاه
أشناقا عندهم ماصاريف صحيحة أتمارا كحلة زحلة باش إصورو ديك لفلوس
وأخيرا كنصح المواطن العادي إباخصوص البيضاوي إبعد على سواق ومن أحسن لكيعرف شي حد من لعروبية إولي إشري قبل ب1000 ولا 1500 ولوحليه 500 درم علف ونساه أولا يهشيو لمرجان وجا لحمو زفر حيت كايعلفوهم بسي كاليم فيه لحوت ولاكن راه مداوي وباين تمان حيت كتشري لكيلو
أولا يمشي لطريق مديونا كيكونو مالين لفيرمات لكبار دايرين قياطن تقريبا بحال داكشي دمرجان
أما إفريقيا ولا لبرنوصي راه غير لايحفض إبيعليك بهيما ديا زبالة تبانليك قد لعجل وسط السوق غير إبيعها ويهرب أهي كاملا مرض
نصائح للشاري من أسواق الدار البيضاء
1 لبهيمة إقول لمولاها هبطها من لكاميو مايطلعش ليها
2 تانيا لبهيما يفرزها من وسط خوتها إلا كانت لتت
3 منين إقلبها إقول لمول لبهيما إبعد نمها أليشدهاش حيت إقدر إدفعها ليك أنتا باغي تهزها ملور توزنها
4 إلا سولتيه على التمان خليه إقول هو وخا يكوليك عطاوني متلا 4000 درهم عطيه دائما تحت من النصف متلا 1700 درهم باش إطيح عليك ب 2500 درهم
5 عنداك من السمسارا واخا مايجكش فاص راه إقدر إبان ليك منين تشري أباش تعرفهم سمع لمول لبهيمة إلا سمعتيه قال (شحال ليدك) عرف راه كيتوا على تسمسيرا بلا ماتعيق أولا كلمت (براهيم أو رابح) عرف قاضيا فيها سمسار ههههه
6 ماعمرك متفهم ودير راسك فاهم ، دير راسك ديما ماعارف
7 لي على قد حالو أمسكين مايشري تال أخر يومين أو النهار الأخر ديك ساعا كيبقا غيير الرتور والشناق خاصو إبيع
8 لي بفلوسو أباغي إشري ب3000 لفوق يقصد لكوارا فلعروبيات وهني لوقت بحا لمداكرا ولاد زيدان
فضالات لسول إوريوه
9 عانداك أعانداكم من مالين لماكازات وسط لمدينة راهم دايرينهم غير في إجمعولبهايم سلعة لمزيانة كتمشي لسوق كايبقا غير الزبل وطلبو فيه الثمن
أالله إصاوب للجميع
لمعندوش مايبحش راه ماشي فرض أعباد الله