سير يا التاجة حتى التازة

سير يا التاجة حتى التازة

الى تازة الحزينة في حدادها الابدي
............
الباطل
شحال طويله يد المخزن
وشحال قصير حلم العاطل
شحال يقدك متحزن
نهار نزل عليك الباطل
......................
خميس النحس
كل محنه كتزيد فالرس عقل
واللي كان خاصنا خدناه
هاد النقطة فيضت الكاس
لخميس فكرنا فالماضي اللي طوناه
......................................
مسيرة سلمية
نضمو مسيرة باش يطلبو خديمه
قامت القيامه وبدا تهراس ضلوع
حليمة رجعت العادتها لقديمة
الزرواطة تارت وخرجت ع الموضوع
......................................
قصور لحلام
بعد ما طوينا الماضي بهمو
قلنا خرجنا من الواد ونشفو رجلينا
جانا كابوس لخميس بدمو
وطاحت قصور لحلام للي برمال بنينا
......................................
حضان تازة
ضربوه حتى تهرسو رجليه
كلا طريحه وعلى قرايتو تجازه
الخير يلاجا يبانو مواليه
هدا سعدو ف حضان تازة
..........................
تخمة العاطل
كلهاو كيفاش جاتو
والزاهي مايكون رفيك لمهموم
الغني عايش حياتو
والعاطل بهم لوعود متخوم
...........................
سير يا التاجة
سيريا التاجة حتى التازة
ديري دورة وطلي ع العاطل
تلقايه معلق شحال من دبلوم واجازة
الراس شاب ولعمر راح باطل
..............................
دار لقمان
ماتقول عشرة حتى يجيو فالقفة
فالنهار المعلوم شربونا لمحان
الغادي والبادي فينا تشفة
راه مازال على حالها دار لقمان
.................................
صبر
صبر صبر زيد صبر
راه صبر من صيفت الاولية
تحمل وما تحتج ما تهدر
ونهار تخدم بدل سمية
...........................
لقراية
قرا حتى شاب راسو
وعلق الدبلوم فالدار
ساين حتى تسوسو ضراسو
ركب قارب الموت وماضهر ليه اتار
...................................