خواطر بين حراك الريف والكركرات

استفزني كلام الزفزافي فالخطابات ديالو اللي من حقو ايديرها كزعيم لحراك الريف في اطار سيادة دولة الحق والقانون اللي كنعيشوها ولو نسبيا ...من بعد ما اخرجنا من عهود الشمة بقطيع النيف وكل مواطن كيعبر على راسو بكل حرية ... استفزني فكلامو هدرة كيعاودها شحال من مرة ...فاش كيقول للبوليس وقوات الامن سيروا للكركرات ..وكيعتبر الانزال الامني فالريف بمثابة امتداد لظهير عسكرة ديال الريف منذ 58 ....
اولا قضية الكركرات قضية وطنية ...والا اتعلنات الحرب مع البوليزاريو راه الدولة من حقها تجند الزفزافي واصحابو كاملين امشيووا ادافعوا على البلاد فالكركرات هما الاولين ....ولذا فهذا القدح في قوات الامن بانهم جبناء وخلاوا الكركرات وجاووا حكروا على ريافة فيه نوع من قلة الفهامة والسب والشتم ....!
ثانيا ليست هناك عسكرة للريف لان الانزال الامني جاء من بعد الخروج للمظاهرات السلمية منذ اشهر ...وكما اشرح الوالي اليعقوبي ان المنطقة ليست عسكرية بها ثكنات ويحكمها قائد عسكري ...الثكنات العسكرية في القنيطرة وبنكرير واكادير وغيرها. وليس في الريف. والحكام مدنيون من الوالي الى القايد والخليفة والمقدم ...والعمدة ورئيس المجلس الحضري والبلدي والقروي والجماعي المنتخبون من طرف السكان ....! ولو كيسميوهم بالدكاكين السياسية وما معترف بهم حتى واحد راهم منتخبين ديمقراطيا وهما اللي كيحكموا فالحكومة... وقانونيا من وراء التصريحات الاخيرة ديال رئيس الحكومة عندهم اليات قانونية ومن حقهم اعلنوا قانون الطواريء ...وهادوك قوات الامن اللي فالريف اوليووا اتجولوا فالشوارع بفرق منظمة..وممنوع التجمع والتظاهر... واللي اخرق القانون اعتقلوه ...وهاذيك هي العسكرة ..
ومن جهة اخرى فان مطالب الريف الاقتصادية والاجتماعية انجز بعضها والباقي في طور الانجاز ...والكل يعلم انه اذا كان هناك من مناطق منكوبة ومهمشة في المغرب فليست منطقة الريف ابدا ..
المطالب اذن تحققات...التهميش ما غاديش ابقا ..بقات الحكرة ؟ عندهم الحق ...القايد اللي اسب المواطنين بالكلاب ما بقاتش بلاصتو فالريف...اقلبوا ليه على شي مقاطعة اخرى في جهة اخرى من غير الريف ...
نرجعوا للكركرات ...اللي ما فهمش الزفزافي ان القضية ما فيهاش غير بعض العصابات ديال البوليزاريو اللي حبسوا الطريق لموريتانيا وداروا لاول مرة منذ وقف اطلاق النار مركز حدودي وديوانة في المنطقة اللي ذاخله في الاراضي ديالهم حسب خرائط الامم المتحدة ....
ولكن علاش اوقع هاذ المشكل ديال الكركرات من الاساس ...؟
هاذي ازيد من 6 اشهر او في الصيف الماضي بعض القوات الموريتانية ذخلوا لمدينة او قرية لكويرة وهزوا فيها العلام ديالهم...ناض المغرب اعترض وخرجهم من لكويرة...وكانت خطوة غير محسوبة العواقب لان المغرب كان اتعامل بدبلوماسية ومبدأ wait & see..ولكن ازرب...موريتانيا ما اعجبهم حال خاصة ان اقليم واد الذهب كان كلشي ديال موريتانيا جاها فحقها وانسحبوا منو ف 79 واذخل ليه المغرب...موريتانيا ناضوا اتفاهموا مع البوليزاريو قالوا لهم اجيوا خدوا بلاصتكم فالكركرات وحبسوا علينا المغرب فالحدود اللي فارضاها الامم المتحدة واقبلها المغرب ....
المشكل ما بقا حل...اي المغرب تخاصم مع موريتانيا غادين اسدوا الحدود بحال الجزائر واعزلونا...ولكن ما اقدروش لان هاذيك الطريق شريان اقتصادي كتنفع منو موريتانيا كتوصلها البصلة ومواذ كثيرة من المغرب ...
البوليزاريو كتطالبو الامم المتحدة باش ابقا statu quo وما احبسش الطريق التجارية ..ولكن ما تمنعوش اقوم بدور الديوانة فالاراضي ديالو...وما عندنا ما نديروا الا فحالات استفزاز قصوى للمغرب غادي اتدخل وتنشب حرب ثاني....وذيك الساعة الدولة من حقها اتجند الزفزافي هو الاول فالكركرات او اتسمى خائن .....!
رغم كل ذلك هناك حلول ممكنة لقضية البوليزاريو سواء الحكم الذاتي في الصحراء المغربية او غيرها ولكن الجزائر لا تريد نهاية الصراع ...