تطوان مَاتْتْ

سميها تطوان ولا تطاوين
ما هي غير الألف تقدم واليا زادت
ياك ما تخربقت عليك العناوين
تطوان اللي كدفتش عليها ماتت
كان وكانت الناس مخاوْيِين
أما دَابَا الحسرة في القلوب فاتت
الرجال ماشين بالهَيْلَلَة والنسا نُوَّاحِين
تطوان نْفْقَاتْ
فحال الحوت على وجه المَا عامت
الراجل ولا مهمال والمرا هجالة
الولد اليتيم جاع
والبنت هزت القيل والقالة
حسرة عليك يا تطوان
جنازتك مَاشَّا بالجلالة
صلينا عليك واقفين
ودفنك على هادْ الحالة
شبَّرْنَا العْزَا فيك والقلوب مْدْمَالَة
كثرو علينا العزايين وعمرت الصالة
كلها وشكا يقول ويدعي برفع البلا
يترحمو على تطاوين وعلى أيامها الغزالة
رحمة الله عليك يا تطوان
مشا زينك وبقاو حروفو
إذا كذبتو خبار الموت
أجِيوْ نْبَابْ المقابر تشوفو