الى روح اللا باتول..

امي...
لا تهجريني
لا تركيني
..
ملّي كانشوف عنيك
كنحس بالدفى
فزمان كلو قر
فزمان كلو برد,
ملّي كنسمع صوتك
كنحس بالامان
فزمان ...
فيه سيف الغدر
تجرد,
منين كنلمس يديك
كنحس بطيار الكون
ملحفة
راية النصر
تغرد...
لا تهجريني
لاتركيني...
غيابك حرك
شوقي ونار اللهفة
وحرك بدواخلي
سؤال بدا يكبر
اش دبّل مشمومك؟
وراقو ناشفة:
خدود لجوار...
الياسمين..والزهر...
لا تهجريني
لا تركيني
تهرس ايقاعي
والحرف خدلني
نهار مشيتي بلا رجوع
كشف لون الخوامي
وخبيت عطرك
وورقة الميلاد
وهزيت تسبيحك
وصرفت حباتو دموع،
وما رتبت كلام قولك
...ومادونت حكايمو
وما قدرت نفتح كتابك
.خليتو مجموع.
كلام مربع على قلبي
هو تاجي وقت السفر،
مخلط بسواكك،وبعطر حبي
هو سراجي وقت آلدجر...
وكحلو فدوايتك مخبي
مالو سومة،كيف شمارك الى شمّر،
وعكرو فاسي ذهبي
كيف لبلاد بلفخر...
كلام مرتب
كلام عميق
كلام جميل...
مزوق بالصبر0
لاتهجريني ...لا تركيني..
زحمة الوقت
نساتني غيابك
عينيك فعينيا
وكلام قلتيه ليا
حكمة ونرد البال
قلتي..
"سوارت الدنيا
ماشي الرضى بوحدو يعطيه،
الدنيا دوارة
الصحاب يكثرو مع كثرة المال،
ولاشحتي دير بقولي ودريه
وعزل قمحو
حبة حبة من ثبن الحال..
عجنو للجايين
وردو على نار مهيلة و سقيه
بزهر الحب و غنيه موال.
يصدو عنك
ملي يثقب جيبك وتخويه
ويرجعو كانو شي ما طرا
عجبا منو هذا زمان.
لا تهجريني لا تركيني
سمحي لي على كل دمعة درفتيها.
سمحي لي على كل شمعة،فطريق السهران
وعلى كل جرحة داريتيها
وعلى كل شيبة،
كنت حيلة وسباب باش تبان..
وعلى شحال جريتي
ودقيتي من بيبان وبيبان.
شحال خممتي،شحال تألمتي
سمحي لي على كل ماجرا
سمحي لي على كل ماكان..
اللاحليمة عزفك خصو شحال من وثرة
قبلي على كلام ولدك هذا بن بوزيان.
الى حسو الناس كلامي لينو صافي نقرة
فخاطرك،خاطر مدهب بالحب وبالسرو المرجان.