بوغطاط المغربي | محمد زيان ولي ضايرين به يعترفون صراحة أنه منبوذ وباغيين فيه الخدمة ومعطيات مثيرة عن علاقته بإسرائيل

الخط :
تحية بوغطاطية للجميع،
التعاطف والتضامن ما عمرو كان كيتطلب أو كيتفرض بزز.
التعاطف والتضامن، يا إما كيكون عفوي وطبيعي أو كيكون مخدوم حيت الجهات لي خادماه بغاتو يكون كبير ويلعب على العواطف.
وفجميع الحالات، التعاطف سواء كان حقيقي ولا مزيف، ما عمرو غادي يكون هو السبب فإطلاق سراح شخص أدانه القضاء فجرائم حق عام، إلا وفق ما ينص عليه القانون.
فالحالة ديال محمد زيان كيظهر بلي هاد التعاطف ما هو عفوي ما هو مخدوم... وإنما كاين اعتراف رسمي من زيان براسو والبوق الإعلامي ديالو المسمى "الحياة اليومية"، بلي السيد أصلا ما معاطف معاه حد... بالدارجة مامحاشيها ليه حد.
وهادشي لي كيفسر الإصرار ديال هاد البوق الإعلامي على أنه يكتر بزاف من المقالات والأخبار على الحالة الصحية ديال زيان.
حكا الحالة الصحية متدهورة جدا... حكا الوضع مقلق... حكا خصو نقل مستعجل إلى المستشفى... حكا ها هو كيموت.... شوية كيرجع لتحليل الأحداث والمستجدات الوطنية والدولية... وشوية تاني ها هو كيموت.... الحاصول، كاين واحد التخبط كبير فمحاولات الحشد الإعلامي لي كديرها الأسرة ديال زيان، عل وعسى تكون شي موجة تضامن معاه، من أجل محاولة الضغط على القضاء.
والحقيقة أن هاد الطريقة الباسلة والفاشلة والمفروشة، كتزيد غير تبين بلي هادشي كلو تبوحيط، حيت ببساطة السيد في حالة صحية مستقرة، والأمراض المزمنة لي كيعاني بها، شيء عادي لسببين:
أولا لأنها أمراض لي كانت بداتو هادي عقود، حسب الاعترافات والتصريحات ديال ولدو المحامي علي رضا زيان براسو لي أكد هادشي في وقت سابق لموقع "فبراير.كوم"
وثانيا، حيت واحد فالسن ديالو، لي فات 80 عام، مسألة طبيعية أنه يكون كيعاني من بعض الأمراض المزمنة، ولكن زيان كيستفد من حقوق الرعاية الطبية ديالو كاملة، حسب ما أكداتو الإدارة ديال السجن في مرات عديدة فالبلاغ ديالها.
فمثلا، آخر ما كاين على الخوبير والتبوحيط ديال الوضع الصحي ديال زيان، أنه قالك حكا تم نقله إلى المستشفى باش يدير شي فحوصات على دقات القلب والضغط الدموي وبلي ركب جوج ديال الأجهزة طيلة ليلة كاملة، واحد لجس نبض القلب، وآخر لقياس الضغط الدموي.
لي ما معمرو ماداز من هاد لبلان، أو ما معارفش شنو هادشي بالضبط، فاش غادي يسمع جوج أجهزة مركبين فالجسد ليلة كاملة، ما نعرف شنو يحساب ليه. والأمر ببساطة يتعلق بفحص شامل عادي، باش كيعرف الطبيب الأوقات لي كيتخربق فيهم نبض القلب والضغط، وبالتالي يعرف التريتمو لي غادي يتبعو والتوقيت لي خص ياخذ فيه الدوا. هاااادا ماكان.
ولكن هاد التهويل، بل محاولة استغباء القراء، بحال زعما شي حاجة خطييييرة، فهذا ما عمرو غادي يكون فصالح محمد زيان.... بالعكس كيزيد يبين بلي هادشي غير تبوحيط ومجرد طلب للتعاطف بزز. الشيء لي كيخليني شي مرات نتسائل واش لي ضايرين بيه، بما فيهم ولدو، واش واعيين بشنو كيديرو، ولكن مع ذلك كيديروها بالعاني حيت باغيين الخدمة فباهم؟ ولا بصح ما فاهمين والو؟؟ فكلتا الحالتين راه غاديين للحيط.
وعلى ذكر العادة ديال محمد زيان فأنه كل ساعة كيخرج يحلل المستجدات الوطنية والدولية، بغيت نعلق على آخر حاجة قالها على إسرائيل.
كيف العادة طبعا، البوق الإعلامي ديالو "الحياة اليومية" نشر مقال بتاريخ 19 أكتوبر، كينقل فيه تصريحات ديال محمد زيان لي قال فيها بلي هادشي لي واقع فغزة هي فرصة تاريخية للتشطيب على إسرائيل من قائمة الدول الأعضاء بالأمم المتحدة بسبب الجرائم لي كديرها فحق الفلسطينيين المدنيين.
أكيد أن جرائم الحرب واستهداف المدنيين، ماكينش شي حد لي ما كيدينهومش. ولكن باش تكون منافق ومتناقض فالمواقف ديالك عاوتاني لا. وباش تستحمر القراء عاوتي لا. وباش تستغل الظرفية غير باش تتاجر بالقضية وتقلي السم بدون سبب عاوتاني لا.
حيت زيان لي كيطالب اليوم التشطيب على إسرائيل من الأمم المتحدة، هو نفسو لي نهار كان باغي يرجع من الأرداف والمؤخرة ديالو قضية رأي عام دولية، مشا عند واحد اليهودي فميريكان سميتو Motti Gabler، باش يطلب من المختبر ديالو واحد الخبرة تقنية على الفيديو لي بان فيه مع وهيبة خرشيش فوضع مخل.
هاد اليهودي لي سميتو Motti Gabler ماشي مجرد يهودي عادي وإنما إسرائيلي حقيقي حتى النخاع، مؤمن بإسرائيل كدولة، وكيدافع على أمنها وأمن الشعب الإسرائيلي، لدرجة أنه كيعتبر بلي ما يقوم به الفلسطينيون هو "إرهاب"، وكيتبنى المفهوم ديال "الإرهاب الفلسطيني" كيف كتشوفو فالصورة أسفله، لي علق فيها على واحد المقال تنشر فصحيفة "نيويورك بوست" الأمريكية، بعنوان: "لماذا "تلقي الولايات المتحدة اللوم على الضحية" في العنف العربي في إسرائيل؟".
نفس الشخص عندو واحد التعليق آخر على واحد المنشور على الدور ديال الأفراد المواطنين العاديين فاش كيكونو هازين السلاح... الدور لي كيلعبوه فالردع ديال المجرمين وعمليات إطلاق النار الجماعية، وكذلك فالدفاع عن أنفسهم بلا مايساينو التدخل ديال رجال الشرطة.
سي Motti Gabler قال فالتعليق ديالو حرفيا:
"تاريخياً، كان على الفرد دائماً أن يحمي نفسه. قبل 1000 سنة، كان الناس يتجولون بالسيوف. اليوم بأسلحتها النارية. أنا سعيد لأن لدينا شرطة وجيشًا وما إلى ذلك، لكن في أفضل الأحوال، يكون زمن الاستجابة 5 دقائق أو أكثر بعد بدء الهجوم. يجب أن نكون قادرين على حماية أنفسنا، وهذا صحيح سواء في الولايات المتحدة أو إسرائيل أو فرنسا أو حتى كندا".
يعني محمد زيان لي كيقول اليوم بلي خاص الأمم المتحدة تشطب على إسرائيل بسبب جرائم حرب، راه هو نفسو لي ختار من دون كاااااع المختبرات التقنية لي كاينة فالعالم، اختار واحد الشخص بحال Motti Gabler لي مؤمن بديك إسرائيل لي كيقول زيان خاص يتشطب عليها ومؤمن بالحق فاستعمال السلاح الفردي للدفاع عن النفس في وجه التهديدات لي ممكن يتعرض ليها الشخص فإسرائيل لي كيقول عليها أنها "إرهاب فلسطيني".
هادشي طبعا مغاديش نفسروه بالخرف والتختريف، وإنما هادشي هو الطبع النفاقي والحربائي لي كاين فمحمد زيان من زمااااان... ويعلم الله طبيعة العلاقات المشبوهة العابرة للقارات لي تقدر تكون عند محمد زيان.
الوسوم
إسرائيل بوغطاط المغربي محمد زيان