فهم تسطا.. البوليساريو عارضة على صيادين جزر الكناري اتفاقية لمدة عام للصيد فمياه الصحرا! وها علاش هاد الإقتراح خاوي

Elouali.zaz.1987@gmail.com
اليوم الجمعة 07 يوليوز 2023 كانت ندوة ديال البوليساريو يحضرها ممثلو نقابات الصيد البحري فجزر الكناري وبعض المنظمات غير الحكومية، ومحامي جبهة البوليساريو، الفرنسي، جيل ديفيرز.
الندوة كتهضدر على الصيد البحري والإتفاقية بين المغرب والإتحاد الأوروبي لي غادي تسالي فغضون 10 أيام، اي بتاريخ 17 يوليوز، ولي ما كاين حتى إشارة حول تمديدها أو تجديدها حاليا بسبب الصرامة المغربية فالتعاطي مع الجانب الأوروبي، بحيث أن الرباط باغية تقطع مع هاديك الإزدواجية ديال الإتحاد الأوروبي وبعض الدول لي فيه، وتكون اتفاقية الصيد البحري إنطلاقة لفِعل واضح من طرف الإتحاد الأوروبي يمر عبر السيادة المغربية على الصحراء بحكم أن نايضة معركة قانونية بسباب دعوى رافعاها البوليساريو كتطالب فيها بعدم شمول الأتفاقية لمياه الأقاليم الجنوبية للمملكة.
محامي البوليساريو، جيل ديفرز، مشا اليوم بعيد خلال الندوة لي دارت فجزر الكناري، وقال بأن الإتفاقية ما غاديش تجدد- هذا ماشي جديد ومعروف- ولكن زاد واحد الكلمة باش يروج لأن موقفو القانوني قوي، وقال أن سبب عدم تجديد إتفاقية الصيد البحري بين المغرب والإتحاد الأوروبي سبابو هو رفض المفوضية الأوروبية، وهادشي ماشي صحيح وإلا كنا ما عمرنا نشوفو أصلا أي اتفاقية تجارية بين المغرب والإتحاد الأوروبي فيما سبق.
المثير فالموضوع، هو أن جيل ديفرز، كيقتارح على مهنيي الصيد البحري الإسبان ولاسيما لي فجزر الكناري أنهم يديرو اتفاقية مع البوليساريو باش يصيدو فمياه الصحرا. هاد الإقتراح موجه ل 13 سفينة صيد كانت كتصيد ديجا فمياه الصحرا خلال سريان اتفاقية الصيد البحري الحالية، واقتارح عليهم مدة عام.
اقتراح جيل ديفرز والبوليساريو على الصبادين ديال جزر الكناري خاوي وبلا معنى، لأن الاتفاقية واخا توقع مع حكومة جزر الكناري لتفترض خاصها تمر للموافقة من طرف الحكومة الإسبانية، وحكومة مدريد أيا كان رئيسها سانشيث ولا البرتو نونيز فييخو ما غاديش يدير هاد الخطأ التاريخي. لأنهم عارفين ردو الفعل المغربية كيفاش غادي تكون ويمكن تخلط أوراق المنطقة كلها ما دام هاد الفعل يمس السيادة الوطنية والوحدة الترابية.