بحال الأطرش فالزفة.. الصبليون ضاربة الطم على قرار الاعتراف الإسرائيلي بمغربية الصحرا وألباريس ما بغاش يهدر

Elouali.zaz.1987@gmail.com
الصبليون ضاربة الطم على الاعتراف الإسرائيلي بمغربية الصحرا وما بغاتش تعلق على القرار واختارت تسكت، بحيث فضّل وزير خارجيتها خوسيه مانويل ألباريس أنه يتغاضى على القرار وما يقول والو عليه.
وزير خارجيتها خوسيه مانويل ألباريس دار فيها واعر فاش سولوه على القرار فمقابلة مع "SER"، وقال بأنه ما كيعلقش على السياسة الخارجية ديال إسرائيل أو أي دولة فالعالم.
هاد السكوت لي اختارت إسبانيا وعدم التعليق على القرار الإسرائيلي ما كانش فاش اعتارفات الولايات المتحدة الأمريكية بسيادة المغرب على الصحرا. الشي لي كيخليها فموقف محرج بزاف انطلاقا من كونها دولة مستعمِرة سابقة للصحرا وكونها عضو فمجموعة "الصحراء الغربية" فمجلس الأمن الدولي، وكتقدم دعم لوجيستي ل"مينورسو" فالصحرا.
فاش اعتارفات ميريكان بالسيادة المغربية على الصحرا، أول واحد خرج هو إسبانيا فعهدوزير الخارجية أرانتشا گونزاليز لي أكدات أن ما فراسها والو فاش عتارفات ميريكان بمغربية الصحرا، وطلع ليها الدم لدرجة أن العلاقات بين مدريد وواشنطن زادت كفاست كثر ما هي مكفسة بسباب بعض الملفات فأمريكا اللاتينية، وهادشي خلا جو بايدن يرفض يتلاقى سانشيث عدة مرات.
لإسبانيا واخا دعمات مبادرة الحكم الذاتي ولكن المغرب فضحها مزيان وخلاها تبان ضعيفة فيما يخص النزاع لدرجة ولات بحال الأطرش فالزفة.. الاعترافات من هنا ومن هنا ومدريد ضارباها بنعسة الشي لي خلاها تؤكد للعالم أن مسؤوليتها فنزاع الصحرا وحضورها محدود جدا.
مسألة أخرى، بالنسبة لتاريخ الإعلان عن القرار الإسرائيلي فهو صعيب جدا بالنسبة لبيدرو سانشيث لي كيدوز من مرحلة صعبة بسباب الانتخابات لي غادي تكون نهار 23 يوليوز 2023، ويقدر ما يعلقش لأن قضية الصحرا تحولات لكابوس بالنسبة ليه مع الإعلام لي لقا دعمو لمبادرة الحكم الذاتي سبّة باش يهاجمو ويخدم أجندة الحزب الشعبي المنافس الرئيسي لحزب العمال الاشتراكي.