تعرض اللاعب محمد الشيبي المحترف بالدوري المصري، لاعتداء فماتش الفريق ديالو بيراميديز ضد الأهلي من طرف لاعب الخير حسين الشحات، اللي مرضاش حيث فريقو خسر بنتيجة 3 مقابل 0. وبعدما سالا الماتش بين الفريقين ضمن منافسات البطولة المصرية، مشى حسين الشحات لاعب الأهلي عند المغربي الشيبي لاعب بيراميدز، وجرو وصرفقو قدام كلشي اللي كان حاضر فالتيران، بحال إلى كاينة السيبة. اعتداء حسين الشحات على المغربي محمد الشيبي خالق ضجة كبيرة بمصر، حيث من العيب أن لاعب عندو تجربة بحالو وكيلعب مع الأهلي المصري الفريق الكبير، يخرج منو فعل بحال هذا، ويتعدى بالضرب على لاعب آخر خصوصا إذا كان اللاعب أجنبي فمصر ومتغرب. حسين الشحات عرف ان القاضية حامضة وملي مشى دوش وبرد عليه راسو، خرج من الفيستيير ومشى كيقلب على محمد الشيبي، وملي لقاه فالكولوار د التيران، بدا كيبوس له فراسو ويزاوك وكيطلب منو المسامحة، وطبعا المغاربة ديالنا دراوش واخا يكونو قباح كيسامحو فحقهم، والشيبي قبل الاعتذار واخا من الداخل ديالو راه بقى فيه الحال، حيث حس بالحكرة. للإشارة راه اللاعبين المصريين متعودين على هاه الدسارة، حيث غير قبل أسبوعين فالفينال د كأس إفريقيا لأقل من 23 عام، فتيران مولاي عبد الله بالرباط، بين المنتخب المغربي ومصر، ناض لاعب من المصريين ضرب راماسور د الكواري وشتف عليه برجلو، وفنفس الماتش لاعب مصري شير بقرعة على مشجعة مغربية فالمدرجات وضربها، وهي كانت غير كتفرج مسكينة.
