تفاصيل ومعطيات جديدة على حرب عايشورة فسطات اللي قتلات قاصر

من بعد متنقل القاصر لي عندو 16 عام لقسم الأموات بسبيطار الحسن الثاني بمدينة سطات من بعد ما لاحو بوطة صغيرة وسط البنوات شاعلين بالعافية و تفركعات البوطة و طارت ليه يدو، كشفات مصادر "گود" أن المصاب الثاني داوه هاد الصباح لسبيطار فالدار البيضاء فحالة حرجة ودخلوه لغرفة العمليات و دبا راه مزال الطاقم الطبي حيدير ليه عملية جراحية بعدما تصاب فراسو.
المصدر د كود تيضيف ،ان القاصر لي توفى مغاديش يتدفن اليوم حتى يجي تقرير ديال الطبيب والخاص بالتشريح ديال الجثة لي غادا تبني عليه لاپيجي البحث ديالها فالموضوع.
هاد الشي سبابو سهرة ديال عبد العزيز الستاتي لي خلات الأمن كلو مركز تما ونسى الدروبة الاخرين لي كان فيهم الحرب ديال الشعالات.
وكانت السلطات المحلية اوضحت أن مجموعة من الأشخاص، من بينهم بزاف ديال القاصرين، كانوا شعلو العافية، مع الحداش ديال الليل البارح الخميس، بأحد الشوارع المتواجدة بديور اتصالات طريق ابن احمد سطات، في عجلات مطاطية مع الإتيان بتصرفات تشكل خطرا كبيرا على سلامة الأشخاص والممتلكات، من ضمنها رمي قنينة غاز من الحجم الصغير بمكان اشتعال النيران، الشيء الذي أدى إلى انفجارها مخلفة إصابة قاصرين بجروح بليغة، لقي أحدهما حتفه متأثرا بإصابته، فيما يوجد الآخر حاليا، في حالة حرجة، تحت المراقبة الطبية بالمستشفى الإقليمي الحسن الثاني بسطات.