تأهل المغرب لثمن نهائي مونديال العيالات صعيب.. الفوز على كولومبيا ما كافيش وخاص كادو كوري ضد ألمانيا

كتبان حظوظ المنتخب المغربي النسوي فالتأهل إلى ثمن نهائي كأس إفريقيا صعيبة، حيث عندو ماتش قاصح مع كولومبيا ضمن آخر جولة، وخاصو يربح بنتجية كبيرة إلى بغا يحسم التأهل بأرجل اللاعبات ديالو، وبدون ما ينتظر نتيجة ماتش ألمانيا وكوريا الجنوبية اللي منطقيا باين شكون رابح فيه قبل ما يتلعب، ولكن راه ممكن يتكاليفا المنتخب المغربي واخا هاد الشي صعيب ولكن ماشي مستحيل.
المنتخب المغربي عندو 3 نقاط حاليا من خسارة ورباح بحالو بحال ألمانيا، ولكن الامتياز عند ألمانيا اللي فالمركز الثاني د المجموعة f، خلف كولومبيا المتصدرة برصيد 6 نقاط، والمغرب فالمركز الثالث، حيث النسبة الخاصة والعامة فمصلحة ألمانيا، بسبب انتصارها على المنتخب المغربي بنتيجة 6 لزيرو، وهذا الشي كيعطيها لافونطاج على حساب المغربيات سوا بالنسبة الخاصة أو بالنسبة العامة.
حظوظ المنتخب المغربي كاينة والتأهل إلى ثمن نهائي المونديال ممكن، ولكن راه صعيب والجمهور المغربي غيخدم الكالكيلاتريس اللي ولفناها مع منتخب د الرجال سوا فكأس إفريقيا أو كأس العالم، ولكن راه من مونديال روسيا 2018 ما خدمناهاش، حيث الأسود ولاو كيتأهلو للأدوار الموالية سوا فكأس إفريقيا أو المونديال اللي وصلوا فيه للدومي فينال فقطر، ودابا غنجبدو الألة الحاسبة، وغنضربو الحسبة لمنتخب العيالات والحظوظ ديالو فالتأهل لثمن النهائي ونخدمو المعادلة د الفيفا لتأهل المنتخبات المتساوية فعدد النقاط، وهي النسبة الخاصة اللي كتعلق بفارق الأهداف المسجلة لكل منتخب والنسبة العامة وهي التفوق فالمواجهات المباشرة بين المنتخبات المتعادلة، وهاديك 6 لزيرو اللي عطات الألمانيات للمغربيات فالجولة الأولى راه عقدات الأمور بالنسبة للبؤات للتأهل إلى ثمن نهائي كأس العالم 2023.
السيناريو الأول لتأهل المنتخب الوطني المغربي إلى ثمن النهائي
فوز المنتخب المغربي على كولومبيا بنتجية 4 لزيرو ويتساوى معها فعدد النقاط برصيد 6 النقاط لكل منتخب، ويتساوى معها فالنسبة الخاصة بناقص واحد لكل منتخب وهنا النسبة العامة هي اللي غتحسم الأمور، حيث المغرب فهاد الحالة ربح كولومبيا وبالتالي لافونطاج عندو د المواجهة المباشرة بين المنتخبين، ويتأهل المنتخب المغربي مباشرة كأول أو ثاني المجموعة، بلا ما ينتظر نتيجة ماتش ألمانيا وكوريا الجنوبية.
السيناريو الثاني لتأهل المنتخب الوطني المغربي إلى ثمن النهائي
فوز المغرب على كولومبيا بنتجية 3 أهداف وأقل، وتخسر ألمانيا أمام كوريا الجنوبية أو تتعادل معها، ويتأهل المنتخب المغربي كثاني المجموعة، وهنا غيتصدر المنتخب الكولمبي المجموعة برصيد 6 نقاط ومتفوق فالنسبة الخاصة على المنتخب المغربي مول المركز الثالث برصيد 6 نقاط فهاد الحالة غيتأهل المغرب، بشرط أن ألمانيا تكون خسرت أول تعادلت ويتجمد رصيدها عن 3 نقاط إذا خسرت أو تتعادل وتولي عندها غير 4 النقاط، أما منتخب كوريا الجنوبية راه خرج من المنافسة على التأهل لربع النهائي.
السيناريو الثالثة لتأهل المنتخب الوطني المغربي إلى ثمن النهائي
تعادل المنتخب المغربي مع كولومبيا وتخسر ألمانيا أمام كوريا الجنوبية، فهاد الحالة غيتأهل المنتخب الكولمبي كمتصدر للمجموعة برصيد 7 النقاط، ويتأهل المنتخب المغربي كثاني المجموعة برصيد 4 النقاط، وخسارة ألمانيا أمام منتخب كوريا الجنوبية اللي مقصي أصلا، غيخلي رصيدها يتجمد عند 3 نقاط.
ومن غير هاد الثلاث سيناريوهات فماكيناش شي طريقة أخرى عند المنتخب المغربي النسوي للتأهل إلى ثمن نهائي كأس العالم للعيالات 2023، عن المجموعة F ، وهذا الشي من غير أن هذه السيناريوهات كتبقى صعيبة تحقق بالنظر لقيمة ومستويات المنتخبات بأربعة ديال هذه المجموعة حسب النيفو اللي بانو عليه فالجولة الأولى والثانية، حيث مستبعد أن كولومبيا اللي ربحت كوريا الجنوبية وبعدها لألمانيا تخسر مع المنتخب المغربي بنتجية 4 لزيرو، وصعب أن ألمانيا بطلة كأس العالم 2 مرات واللي رحبت المنتخب المغربي بسداسية فأول جولة وخسرت مع كولومبيا بالشمتة وبهدف قاتل، وتنهزم مع كوريا الجنوبية الحلقة الأضعف ديال هاد الكروب، أو تتعادل معها وتودع المسابقة بهذه السهولة، وطبعا كتبقى كرة منفوخة بالبرد وكلشي ممكن.