بزّاف د الزماگرية مابقاوش كايجيو يدوزو الصيف فالمغرب غا بسباب العشوائية والجقير: الگارديانات صحاب ختشي خلصيني باغي نمشي والسعّاية صحاب ختشي دوقيني من الفريتش وصحاب الريسطورات ولوطيلات والديور لي كاتزاد فيهم ضلعة

المغرب عندو سياحة قوية بالمقارنة مع الدول لي فالمنطقة لي جينا فيها وايه بصح نجح أنه يخلق لراسو ماركة مسجلة فالعالم كامل! خصوصا شي مدن فحال مراكش وفاس والصويرة وأگادير راه ماكاينش شي حد ماكايعرفهمش وماكايحلمش يزورهم! لدرجة الگور كايعيقو على بعضياتهم بديك الجملة ديالي "جيطي آ ماغاكيش"! وگاع ليسطار الكبار كايعجبهم المغرب وكايعجبهم يشوفو داك المزيج بين الأصالة والمعاصرة لي كاين فيه فحال أوبرا لي جات مؤخرا، زارتنا وتصورات وعجبها الحال! حاجة لي صعيب تلقاها مثلا فدولة فحال الجزائر ولا موريتانيا ولا حتى تونس لي عندها شوية د السياحة !
ولكن واش هادشي كافي يخلينا نكونو فرحانين؟ ونقولو راه عندنا سياحة؟ طبعا لا!
أنا بعدا كزماگرية! ماكانجيش فالصيف وماعوالاش نجي فالصيف، ماشي حمقة أنا نخلي أوروبا بالشواطئ ديالها الواعرة النقية والنظام والحرية ونجي ندوز الكونجي ديالي فالزحام والعشوائية والجقير! وسط الگارديانات وصحاب الكرارس والسعاية كلشي باغي يجقر منك شي حاجة وكلشي باغي ينصب عليك! ختشي خلصيني دابا خاصني نمشي! ختشي عطيني شوية د الفريتش! ختي هاه ختشي شوفي مابغيت لافلوس لا والو هانتي يا الله معايا للحانوت وشري ليا الحليب للدرّي !
تا راه شي أفلام ماتلقاهمش فأعتى بلدان إفريقيا السوداء لي كانقولو عليهم فقراء وقاتلهم الجوع والزلط! ماغاديش يتلاح ليك دري صغير على الباربريز بالرشاشة د الما ويبدا يمسح باش نتا تعرك وتعطيه جوج ولا ثلاتة الدراهم !
راه ماكاينش للي خارج على المغرب قد العشوائية! شوف مثلا جنوب إسبانيا، جهة لاكوصطا ديل صول، من ماربيا ونتا طالع مرورا بفوينخيرولا وطوريمولينوس ومالاگا، آش كاين گاع؟ ماكايناش شي حاجة خارقة للعادة، كاينة بنيات سياحية وفنادق وتشيرينگيتويات وبيران لي كاينين حتى فالمغرب ومن غدا لابغا المغرب يطلع اكثر غايطلع اكثر ولكن مابقاتش فالبنيات! كاين الصهد والنخل والغبرة فحال الأجواء لي كاينين فالمزوضية ولكن باش فايتينا؟ فايتينا بالنظام، ماكايناش العشوائية! فايتينا بالحرية: لبس لي بغيتي وشرب وعوم وتبحر وتعرى نتا گاع وفايتينا بالمعقول فالأثمنة والخدمات !
حيت السياحة راه ماشي غا سير جيب السيما طلع أوطيل هنا! سير جيب الياجور طلع ريسطو لهيه! سير خلط البغلي وطلع معاك شي بار هنا! السياحة راه حتى هي كاتخضع لواحد المنظومة د القيم على رأسها الحرية والاحترام والجودة! عاااااد كاندويو على السياحة، أما إلى ماكانوش راه كاتبقى البلاد فيها سياحة بدائية فولكلورية كاتخلي الناس تجي تزورك فاش كاتبغي تفكر كيفاش كانو كايعيشو جدودها في العصر ما قبل ظهور السترينغ!