حمام العيالات: تجربة بشعة للطفل المغربي يدخل للحمام مع مو تسلخو و تحك ليه

ماعمرك دخل لشي حمام ديال العيالات فيه الدراري الصغار و تلقى الهدوء و السكينة ! تغسل عظامك في اطمئنان ! لا ضروري تلقا الغوت و الزگا و هادا حال فمو كايبكي حيت مو كاتحك ليه ! و هادي خنونتها خرجات بواقة حيت مها كاتمشط ليها شعكاكتهاو ضروري مرة مرة تسمع شي ” و الله يا مك ماسكتي من البكا تانسلخك”
الحمام المغربي تجربة بشعة للطفل، بصح، شكون هاذ الطفل لي كاتلقاه باغي يمشي للحمام و فرحان و كايتبع مو بروح رياضية ؟! الأغلبية كايجيبوهم ماواتهم بزز، كايجروهم من قدام الرسوم و من التيرانات د الفوت و من حدا صحابهم لي كانو كايلعبو معاهم باش يغسلو ليهم فالحمام.
تا دري صغير بعقلو ماغايحملك تهزو فنهار عطلتو و تديه لبلاصة سخونة ! فيها الضبابة ! الضو قليل ! الزحام العيالات عريانات كولا وحدة گد السداري غا السگيطة على ختها ! و فوق هادشي كلو تشديه و تبداي تحكي ليه بكيس حرش كحل ! حك حك حك فحالا شادة بريق ديال النحاس ماشي دري صغير فيديك !
معلوم مايبدا يغوت و يفرع لينا الرك
معلوم مايكره الحمام !
و معلوم مايكبر موسخ معفون كايكره الما !
أنا شخصيا كانشوف الحمام من أعظم الاختراعات الانسانية، الحضارية، و الحمامات العمومية كانت عبر التاريخ عند أعرق الحضارات الهنود، الرومان، الأتراك، الأندلسين لي جا لعندنا للمغرب عن طريقهم، و طبعا فوقت كانت أغلب الديور غير مجهزة بالدوشات و الحمامات كان الحمام مسألة ضرورية حدا اي تجمع سكاني…
غادي ينقص التوافد على الحمام ملي كل دار غايولي فيها الدوش و البينوار … ولكن بزاف ديال المغاربة مازالين وفيين لهاد العادة و عندهم الحمام ضروري مرة فالسيمانة و لا خمسطلشريوم ! كاين گاع لي كاتقولك ” واخا كاندوشو فالدار، ماكاينش فحال الحمام يا ختي” ” لهلا يخطينا حمام” … على هادشي مازال الناس كايستثمرو فالحمامات و فين ماكاينش شي حي جديد و اقامات جديدة كاتلقا الجامع و الحمام حداهم كايتبناو.
شحال هادي، قبل ظهور عصر ” الگوماج و السافوناج” و الحمامات ديال الفين ريال ! كان الحمام بالاضافة للدور ” الصحي” لي كايلعب فالحفاظ على نظافة المغاربة، كان من البلايص لي كايجمعو العيالات من جميع الفئات الاجتماعية ( لي لاباس عليها ! لي حازقة ! الخدامة ! لي جالسة فالدار، القاضية و الخياطة و مرات العسكري) كلهم كاتلقاهم مستفات كايسلتو فشعرهم هاك بالاك هاك بلاك و بالتالي كان كاينجح الحمام فتحقيق المساواة لي الدولة براسها ماقاداش تحققها !
و دابا بالرغم من المنافسة ديال الدوشات فالديور و البينوارات ! و بالرغم من ديك الهضرة ديال الحمام موسخ ! الحمام فيه البكتيريا! و مامزيانش للقلب مامزيانش للرية ! بزاف ديال العيالات كل سيمانة كايهزو السطولا و الطاسة و الجلدة و كايمشيو يفرشو حدا الروبيني السخون …
و لكن ! هادشي ماكاينفيش انه من خلال التجربة الشخصية ديالي، نقول بانه تجربة بشعة للطفل، ماكاتحببوش فالغسيل و الما و الصابون بقدر ماكاتنفرو منهم ! خصوصا داك الحكان الكافر بالله ! داك الكيس الحرش الكحل مسخوط الواليدين ! لي كايشوفو الدري الصغير فحالا شاف گباض روحو …
هادشي علاش الامهات خاصهم يتكايسو شوية على ولادهم ! و يرخفو عليهم من ديك حك حك حك الدري كايشبه لباه حمراني و هي باغا تخرجو بيض بالحكان ….و يحاولو يردو من الحمام تجربة ممتعة، راه داك ولدك لي كاتعقديه نتي فالصغر من الما و الغسيل هوا شخشيا لي كايجي ينشر علينا بيطانو و يگلبنا بريحة الصنان فالطوبيس فاش كايكبر.