خاص. وختامه بكاء فالعيون. للقاء اللي تأثر فيه بزاف دي مستورا من فضاحات تعذيب البوليساريو للصحراويين: هاد لكلام =على التعذيب= توشاني بزاف وانتوما من اهم المجموعات اللي تلاقيتها. العربي ل"كود": اللقاء كان ممتاز

سالى قبل قليل بقاعة باوطيل بارادور بالعيون فالجنوب المغربي لقاء بين دي ميستورا المبعوث الاممي الخاص الملكف بالصحراء مع مجموعة من العائدين. اللقاء دام شي ساعة و40 دقيقة. كانت القهوة واتاي والحلوى والما والتمر. هاد الشي ما كانش كافي باش يدوز فواجع والام تجبدات فهاد المدة.
اللقاء حضر ليه العائدون: العربي ولد النص مدير مركز "السلام" للدراسات السياسية و الإستراتيجية والخبير العسكري وواحد من كبار المثقفين فالمنطقة كما حضرات سعداني ماء العينين واحمد الخر والشويعر وعدنان ربيوه احد المختطف بالجزائر خليل ربيوه وزين العابدين الوالي وابن سمارة لبصير.
حسب تصريح العربي ولد النص ل"كود" فاللقاء كان "مثمر ومهم جدا" والنقاشات كانت "ممتازة" يضيف فتصريح مقتضب.
عائد اخر فضل عدم ذكر اسمو ل"كود" اكد باللي دي ميستورا براسو اعتارف باللي هاد اللقاء اليوم فاخر لقاءاتو بالعيون قبل انتقالو الليلة للداخلة٬ كان "من اهم المجموعات اللي تلاقيتهم" يؤكد مصدر "كود".
فهاد اللقاء حكى كل عضو على تجربتو. على التعذيب اللي تعرض عليه فالبوليساريو. كانت تفاصيل مؤلمة "توشات" المبعوث الاممي الخاص٬ يضيف مصدر "كود".
واضاف مصدر "كود" باللي دي ميستورا تفادى يسولنا باش ما يزيدش فالجرح اللي كنعانيوه. طبعا كان لبكا اللي ما قدرش يحبسو عائد تعذب باش هدر على ما تعرض ليه. لحمو تقطع وبغى يوري للمبعوث الاممي هاد الشي وما قدرش وفنفس الوقت ما قدرش يغالب الدموع يوضح مصدر "كود".
فهاد اللقاء قدم احد المشاركين مقدمة على التجربة فالبوليساريو. جبد الاستنتاجات السياسية من هاد الكذبة لكبيرة للحديث عن "شعب" وهو فالحقيقة 6 او 7 جنسيات دخلو ناس الصحرا فقضايا جهوية وولاو كيخدمو اجندات اخرى.
فهاد اللقاء وفق مصدر "كود" كانت الهدرة على تجربة ادماج العائدين فالمغرب وكيفاش هاد التجربة ممكن تشمل سكان المخيمات. تجبد موضوع حركة الصحراويين من اجل السلم وعدم نجاحها.
حسب مصدر "كود" فدي مستورا كان كيسمع وكيعطي لكل واحد الوقت الكافي للهدرة. ما يقطع حد. كان فغاية الادب