الكعبي: أي خصم دابا والا باغي يربحنا ولكن حنا عارفين شنو تابعنا وها كيفاش كنوجدو لتنزانيا

اكد الدولي المغربي ايوب الكعبي ان الاجواء داخل المنتخب الوطني المغربي زوينة، فالمعسكر التدريبي استعدادا لمواجهة تنزانيا ضمن اقصائيات كاس العالم 2026، وأنهم عارفين المسؤولية اللي عليهم خصوصا وان كاع المنتخبات اللي كتلعب دابا مع الأسود عندها طموح مضاعف باش تربحهم.
وتحدث ايوب الكعبي على هامش الحصة التدريبية الثانية للمنتخب المغربي فمركز محمد السادس بالمعمورة يوم الثلاثاء، وقال: "التجمع ديال المنتخب ديما كيكون عائلي وحنا بحال الخوت ودابا مركزين على الماتش الاول امام تنزانيا وعارفين شنو تابعنا فهاد الماتش ونتمناو نحققو فيها نتيجة ايجابية اللي ترضينا وترضي الجمهور المغربي".
وكمل الكعبي وقال: "اي خصم كتبغي تواجهو خاصك تعرف نقاط القوة والضعف ديالو وحنا مركزين وعارفين شنو تابعنا باغيين نديرو نتيجة ايجابية ونكملو فالمسار اللي بدينا فيه ودابا اللي كيواجه المنتخب المغربي كيبغي يربحو، ولكن حنا عارفين شنو تابعنا وشنو هي افريقيا، ونشكرو الجماهير المغربية اللي ديما كتساندنا فالسراء والضراء".