عادل رمزي: سيمبا فريق كبير والماتش ضدهم صعيب وغندخلو نربحو وها الإصابات اللي عندنا وشكون يقدر يغيب

أكد عادل رمزي مدرب الوداد الرياضي أن الفريق غيدخل ضد سيمبا التنزاني غدا السبت فمراكش ضمن الجولة 3 من دور مجموعات دوري أبطال أفريقيا باش يربحو، وأنه ما بقاش عندو خيار آخر وبلي اللاعبين عارفين المسؤولية اللي عليهم، واخا الماتش غيكون صعيب.
وتحدث عادل رمزي فالندوة الصحافية اللي كتسبق ماتش الوداد الرياضي وسيمبا التنزاني وقال: "عارفين الأهمية ديال ماتش سيمبا والظروف النتائج اللي درنا فالجوج ماتشات الأولين وهاد الماتش مهم والنتيجة فيه مهمة بزاف، خصوصا وأنها غتلعب عندنا فبلادنا، وبالنسبة للاستعدادات كتدوز فنفس الظروف وتقنيا ما عندنا ما نبدلو ولكن المسؤولية كبيرة دابا حيث ما كاينش مجال للخطأ، واللاعبين حاسين بالمسؤولية وشفت الرياكسيون فماتش مولودية وجدة والطاقة اللي عطاو ومشكورين عليها وكنشوف فعينيهم أنهم باغيين يكملو هذا الشي فالماتش ضد سيمبا".
وكمل رمزي: "الماتش كانو متابعين فشهر والريتم كان أنكروايابل خصوصا وأنه كان السوبر ليك الأفريقي هذا الموسم وهذا الشي عمرو كان وبصراحة برافو على الدراري حيث تحملو الضغط والسفر وكثرة الماتشات كل يومين ولا ثلاثة أيام، وحنا لعبنا غير البارح وهذا الشي عذر حيث كاين فالطرب ديال الكورة وحنا فريق كبير خاصنا نتأضبطاو ولكن خاصنا نحضيو لافريشور والإصابات اللي بداو كيبانو وما نساوش اللاعبين اللي راجعين منها بوالفتح والعملود وبوسفيان عندو إصابة وغنشوفو واش غيكون واجد للسبت وهادشي من غير العيا اللي حتى هو كاين وخاصنا نوجدو اللاعبين حتى ذهنيا".
وزاد رمزي: "سيمبا فريق كبير عندو طريقة اللعب واضحة بفضل المدرب ديالهم الكبير عبد الحق بنشيخة والماتش غيكون زوين وهذا الشي اللي باغيين يكون فلافريك وتكون الكورة ضد الكورة والمباراة صعيبة وحنا خاصنا نكون فالمستوى ديالنا عندنا طريقتنا فاللعب والإمكانيات ديالنا وإلى كنا حاضرين ذهنيا وبدنيا فأنا تايق أن الفريق ديالنا قادر يقدم مباراة كبيرة".