بعد جولة جوشوا هاريس فالمنطقة.. وزير خارجية اسبانيا جاي للمغرب السيمانة الجاية

Elouali.zaz.1987@gmail.com
قالت وسائل إعلام إسبانية، أن وزير الشؤون الخارجية الإسبانية، خوسية مانويل ألباريس، غادي يزور المغرب الاسبوع الجاي.
ووضحات المصادر لي هدرات على الزيارة، أنه ما كاينش يوم محدد لهاد الزيارة، ولكن وزير الخارجية الإسبانية، خوسيه مانويل ألباريس من الممكن يكون فالمغرب نهار الخميس الجاي، علما بأن عندو إلتزام مع رئيس الحكومة بيدرو سانشيث نهار الاربعاء فستراسبورغ ففرنسا.
وأضافت المصادر نسبة لمصادر حكومية، أن هاد الزيارة كتحجي فإطار إستئناف التنسيق بخصوص خارطة الطريق المتفق عليها بين رئيس الحكومة الإسبانية، بيدرو سانشيث، والملك محمد السادس فإجتماعهم فأبريل 2022.
وتابعت أن أجندة الزيارة فيها بزاف ديال النقاط لي غادي يبحثها خوسيه مانويل ألباريس مع المغرب ومن بينها قضية الجمارك وفتحها فسبتة ومليلية، مشيرة انه من الممكن ان الباريس يمدد زيارتو باش يمشي أيضا لموريتانيا والسنغال على ود ملف الهجرة بحكم أن جزر الكناري كتعاني من هاد الأزمة وارتافعات فيها نسبة المهاجرين غير الشرعيين لي كيوصلو من هاد البلدان بشكل كبير.
هاد الزيارة بدون أدنى شك غادي يهدر فيها خوسيه مانويل ألباريس مع ناصر بوريطة على الصحرا ومستجدات الوضع، وما يمكنش ما نربطوهاش بزيارة مساعد وزير الشؤون الخارجية الأمريكية، جوشوا هاريس، للجزائر والمغرب لي مضروب عليها الطم، خاصة فظل تراجع الدور الإسباني فنزاع الصحرا وتولي الولايات المتحدة الأمريكية لزمام الأمور فيه.
الزيارة أيضا من الممكن تخلي الجزائر تتوجس منها لنفس السبب المتعلق بجولة جوشوا هاريس، ولكن ما عندها ما دير بسباب الهدوء لي بدا كيسود فعلاقاتها مع مدريد، لاسيما بعدما طيحات النيف للأرض ودارت سفير جديد ليها فمدريد كينتاظر فالثلاجة اعتمادو رسميا وتسليم أوراق إعتمادو.