السيبة فجامعة سطات.. طالب فENCG تكرفص على أستاذة فقاعة الامتحانات ومصدر ل"گود": الفراغ لي كين فالإدارة وتصفية الحسابات هما سباب العنف للي رجع للواجهة

كثرات السيبة فجامعة سطات. المدرسة الوطنية للتجارة والتسيير بالمدينة، عرفات البارح الاثنين، واحد الفضيحة بطلها طالب جامعي تعدا على الأستاذة بشرى العبادي باللكم المرفق بالسب والقذف فأول أيام الامتحانات.
وعلى حساب ما كشفات مصادر "گود" فالطالب اللي قاري زعما في ليسي ديكارت وماماه وباباه كونطابليين يعني ولد عائلة، مني دخل قاعات الامتحان وهو كيستفز فعناصر الحراسة وكيقوليهم متحرسونيش، فتدخلات الأستاذة عبادي وقالت ليه اولدي سكت خلي صحابك يدوزو الامتحان، ناض ليها وشبع فيها سبان ومن بعد ضربها وهرس ليها نيفها.
فهاد الإطار دارت النقابة المغربية للتعليم العالي والبحث العلمي، بيان، كتوفر ''گود'' على نسخة منه، وللي قالت فيه: ''عرفت المدرسة الوطنية للتجارة والتسيير بسطات صباح اليوم اللول ديال امتحانات الدورة الأولى بتاريخ 18-12-2023 حادثاً خطيراً، إذ تعرضت زميلتنا الأستاذة بشرى العبادي، أثناء قيامها بواجبها المهني داخل قاعة الامتحان، إلى الشتم والتعنيف الجسدي من طرف طالب بالأسدس الأول، مما أسفر عن كسر مزدوج على مستوى الأنف، وكذا رضوض في الوجه والجسد''.
وأضافت النقابة المغربية للتعليم العالي والبحث العلمي في ذات البيان، ''وعلى إثر هذا الاعتداء الشنيع، يستنكر المكتب المحلي للنقابة المغربية بالمدرسة ما حدث، ويشجب بشدة هذا التصرف الأرعن، ويندد بالتدني المخيف لسلوك بعض الطلبة تجاه الأساتذة وغيرهم من المتدخلين بالمدرسة''.
وختمت النقابة بيانها بالتضامن مع الأستاذة المعتدى عليها، ويطالب إدارة المؤسسة باتخاذ كافة الإجراءات التأديبية والإدارية والقانونية لمتابعة المعتدي، ويتعهد المكتب بنهج كل الأشكال النضالية للدفاع عن كرامة الأستاذ، ومن خلالها صون كرامة الجميع بالمدرسة.
وهاد الشي كامل ولا كيوقع فالمدرسة الوطنية للتجارة والتسيير بسباب الفراغ اللي كتعرفو الإدارة منذ إعفاء المدير السابق عبد الصادق الصادقي، زيد على هاد الشي أن عبد اللطيف مكرم رئيس جامعة الحسن الأول بسطات للي هو المدير بالنيابة، كاينة ملاحظات على أنه فوقتو الجامعة بدات عاود ثاني كتفقد الهيبة ديالها نتيجة هاد السياسات ديال كلشي واقف.