شكون هاد المسؤول العبقري في مدينة فاس لي قاليه راسو يشد الطريق لي كتوصل لسبيطار الغساني عاد تصاوب من بعد سنوات وهو مخرب ويعمرو ضوضانات راه غزة ومافيهاش هاد الحالة.. فاس واخا مدينة عريقة وعاصمة للمغرب سابقا كيتم تسييرها بحال قرية بامحمد أو تيسة

فاس مدينة عجيبة، كتلقى ولاد هاد المدينة في مراكز المسؤولية في المدن الكبرى وخصوصا طنجة ومشرفين على المشاريع وخدامين بالنية، وهنا نيت كتلقى ناس قاريين واعيين فاهمين ولكنهم قلة، ومع ذلك، فاش كتشوف حال المدينة وطريقة التسيير ديالها بحال إلى ماشي أعرق مدن المغرب والعالم وعاصمة المغرب حتى القريب بل كيسيروها بنفس طريقة تسيير قرية با محمد وتيسة وباقي الفيلاجات والمدن الصغرى المحيطة بهاد المدينة، وحتى وفرح سكان المدينة بشي حاجات بسيطة، راه الى دارو غير رومبوان جديد أو سدو حفرة كتلقى ناس المدينة فرحانين، وغير واحد الطروطوار صايبوه فيه شي تلاتة كلم في طريق لوطوروط جهة عين الشقف راه ولاو يعتابروه فواسة بحال كورنيش أكادير مكيخواش لا ليل لا نهار، بينما مدن بحال طنجة والرباط وتطوان ونواحيها لي مابقاتش فيها حفرة وحدة في الطريق والبنية التحتية من أحسنهم في المغرب وإفريقيا كاملة كتلقى سكانها كاع معاجبهم الحال وديما باغين كثر ومطالبهم لا تنتهي وساخطين، بينما فاس إلى دارو ليهم غير طروطوار وجو شجرات يعم الفرح المدينة بحال إلى داروهم فسي بوعثمان.
مقطع طرقي صغير ديال كلم أو جوج إلى بغاو يقادوه في مدينة فاس راه كيشد سنوات وغير شي هبطة بحال ديال ويسلان مثلا بقات سنوات تم، بينما نفق وجوج قناطر كيشدو شهر ديال الوقت في الرباط، مؤخرا، صلحو واحد الهبطة لي جات جنب ماكدونالد ديال برج فاس وكتمشي حتى لمصحة السلايكي ومستشفى الغساني، وهاد المقطع الطرقي هو لي كيوصل للسبيطار والمصحة وديما فيه زحام، وفي اللول استبشر سكان المدينة خيرا وعمت الفرحة فاس ومكناس والنواحي، وأخيرا تصاوب هاد المقطع حيت كان مخرب ومهلوك، غاهو هاد الفرحة مادامتش بزاف دغية جا شي عبقري مولف بمداخل القرى والبوادي لي فيهم مدرسة جنب الطريق، وهو يعمر هاد المقطع بالضوضانات وكل وحدة تقريبا قد جبل زالاغ كتحس بالطوموبيل كتهز وترجع تطيح، وهادشي في طريق السبيطار وطريق المصحات والمدارس ولافاك.
بالله عليكم شكون هاد المسؤول العبقري في مدينة فاس لي قاليه راسو يشد الطريق لي كتوصل لسبيطار الغساني عاد تصاوب من بعد سنوات وهو مخرب ويعمرو ضوضانات راه غزة ومافيهاش هاد الحالة، كيفاش حتى عطاتك خاطرك تشد طريق جات في العقبة وتفصل بين خطوطها بحاجز أولا وتزيد الضوضانات تانيا، هاعلاش فاس مدينة غريبة وغير مفهومة، لأنها مدينة عريقة عندها تاريخ ونخبة متعلمة وقارية هادي قرون، ومع ذلك مدينة متخلفة في كل شيء ومقتولة، وحتى المشاريع لي كتدار فيها راه ديال بداية الألفينات، مثلا دارو ممر للتنزه والمشي وجابو شي عواد وحديد حطوهم لممارسة الرياضة، والله إلى بحالهم تدارو في طنجة في الراه راه في الألفينات وفي منطقة خارج المدينة، دابا راه حاطين ماتريال ديال الحديد دبصح بجال لي دايرين في الرباط وسلا وباقي المدن، حتى كيشيط الخير على كرسيف وتينجداد وبنكرير عاد كيوصل لفاس على مايبدو.