الجزائر غادي تبدا عضويتها غير الدائمة فمجلس الأمن اليوم.. شنو ممكن دير باش تكرس العداء للمغرب

Elouali.zaz.1987@gmail.com
اليوم الثلاثاء الموافق لتاريخ 2 يناير 2024, غادي تبدا الولاية الإنتدابية ديال الجزائر فمجلس الأمن الدولي كعضو غير دائم فالمجلس، بالإضافة لأربع دول أخرى ولمدة عامين من يناير 2024 حتى لدجنبر 2025.
العضوية غير الدائمة لمجلس الأمن الدولي بالنسبة للجزائر كتشكل محطة باش تمرر عداءها للمملكة النغربية وغادي تخصصها للدفاع عن جبهة البوليساريو وأطروحتها من نزاع الصحراء وهادشي ديجا قالوا رئيسها عبد المجيد تبون ووزير خارجيتو أحمد عطاف.
الجزائر فهاد الولاية غادي تخاول ما أمكن باش توفر غطاء سياسي لجبهة البوليساريو، بخيث أن گاع الرسائل اللي غادي تبعث البوليساريو للمجلس وللأمم المتحدة غادي تكون الجزائر هي الناقل ديالها لأن هاد الرسائل خاص تمر عبر شي عضو سواء دائم ولا غير دائم وفهاد الحالة ما كاين ما أحسن من الجزائر باش دير هاد المهمة.
بالإضافة للرسائل غادي نشوفو مناكفات فمجلس الأمن فكل أبريل وكل أكتوبر، شهر ابريل لانه موعد الجلسة نصف السنوية اللي كيقدم فيها الأمين العام والمبعوث الشخصي ستافان دي ميستورا ورئيس "مينورسو" ألكسندر إيفانكو إحاطة للدول الأعضاء بخصوص الجهود اللي دارو فست شهر من بعد قرار مجلس الأمن حول النزاع رقم 2703.
وبالنسبة لأكتوبر فهو موعد غير عادي بالنسبة للجزائر اللي غادي تكون فالمجلس فاش غادي تنعاقد جلسات مجلس الأمن حول الصحرا والتحضيرات المرافقة لإعتماد قرار جديد حول النزاع، واخا قضية الصياغة كتكون حصرية لصاحبة القلم الولايات المتحدة الأمريكية اللي ما كتسوقش للدول الأخرى وكدير ما بغات.
بالإضافة لما سبق كاينة حالات إستثنائية، وكتعلق بالتطورات والمستجدات اللي ممكن توقع فهاديك الفترة، فبحال إذا وقع حدث كبير ممكن للجزائر تطلب عقد جلسة إستثنائية، وآخر مرة شفتا فيها هاد الخالة كان يامات الإعتراف الأمريكي بمغربية الصحرا فاش طلباتها ألمانيا ودارت وناقشو قضية الإعتراف وما وُصف آنذاك بعدم حياد الإدارة الأمريكية بخصوص النزاع بعد هداك الإعتراف.
من جهة أخرى، بالإضافة للجزائر كاينة أربع دول أخرى غادي تاخد العضوية غير الدائمة ويتعلق الأمر بغويانا وسيراليون وسلوفينيا وكوريا الجنوبية، وهاد الدول تحل محل ألبانيا والبرازيل والغابون وغانا والإمارات العربية المتحدة اللي تسالات الولاية الإنتدابية ديالها.