واش البام غايتحل ولا ولات تحكمنا جريدة بن يحمد ؟ جون أفريك ردات على الحزب الثاني فالحكومة وتحداتو: وزير ومتهمين آخرين فالبام مشمولين بالتحقيق فملف اسكوبار الصحراء اللي فيه ارتباط الحشيش بالسياسة والمال

"جون افريك" فمقال جديد، هضرات على تطورات جديدة في ملف "اسكوبار الصحراء"، ربطت فيه بين المخدرات والمال والسياسة، فجانب السياسة هضرات على حزب الأصالة والمعاصرة.
جون افريك دارت رد على بيان المكتب السياسي للأصالة والمعاصرة اللي علن على انه غايمشي للقضاء ضد صحف ومدونين بتهم الاساءة للحزب وتشويه صورته في ملف بيد القضاء، وقالت المجلة بلي :"البام فيه متهمين آخرين فضوسي اسكوبار الصحراء". بل أكثر من ذلك المجلة الفرنسية قالت بلي ملف اسكوبار الصحراء جمع بين السياسة والمال والحشيش، طبعا فالسياسة كتقصد البام.
الفرنسيس مادام مجلة بن يحمد فباريس وعندها بركاكة ديالها عندنا دبا ولاو يقولو للبام ها شنو حقيقتكم ونتوما فيكم وزير متورط محتمل إضافة إلى قادة سياسيين آخرين. هنا سؤال واحد لي غايطرح :"واش البام خصو يتحل على حسب ما يفهم مما نشرتو "جون افريك".
نفس المجلة قالت فأواخر سنة 2022، بلي غايكون تعديل حكومي غايطير فيه كل من عبد اللطيف وهبي وزير العدل وعبد اللطيف ميراوي وزير التعليم العالي. دبا دازت عام وصرف، مازال ماشفنا هاد التعديل.
على هاد الحساب الفرنسي هوما لي كيحددو شكون يبقا وشكون يطير فالحكومة. وكيحددو كذلك مستقبل حزب عندو المؤتمر فالشهر المقبل ايام 9 و10 و11 فبراير 2024.
المكتب السياسي للبام فالاجتماع الأخير يوم 4 يناير، أكد بلي غايدير المؤتمر فوقتو، وأنه متابع قضية متابعة كل من عبد النبي بيوي وسعيد الناصري، العضوين فالبام، وأنه كيحترم القضاء للي فيه ضمانات المحاكمة العادلة وقرينة البراءة.