نقابة الاموي كتروج الفايك. كيفاش الوفد الصحافي عايش ف"مراكز اللاجئين وعلاش لكذوب علي الاقامة والماكلة. راه كثر من 100 ساكنين فاحسن ما كاين فسان بيدرو وعندهم ظروف ما عمرها توفرات قبل =تصاور=

مصطفى الشاذلي كود سبور سان بيدرو الكوت ديفوار ///
حشومة الكونفدرالية الديموقراطية للشغل. نقابة نوبير الاموي كتطلع كتروج الفايك ولكذوب فبيان لنقابة تابعة ليها اسمها النقابة الوطنية للاعلام والصحافة. هاد النقابة دارت بيان قالت فيه باللي الصحافيين المعتمدين لتغطية "كان الكوت ديفوار" بمدينة سان بيدرو تعرضو٬ وسمعو ل"تحقير وتهميش" فاقامتهم بهاد المدينة.
وقال البيان اللي كلو تضليل بللي "جزء كبير من البعثة الاعلامية الوطنية المكلفة بتغطية كأس افريقيا للامم بالكوت ديفوار تعرض ل »اهانة واذلال وتهميش وتحقير واستخفاف من قبل ما سماه المركب المصالحي الاعلامي المشرف على الوفد الصحافي ». كذوبهم وصل مستوى كبير باش قالو باللي "56 صحافي وتقني من الصحافيين المعتمدين كانو فاقامة كتشبه لمراكز ايواء اللاجئين". اول كذبة هو ان اللي عندهم اعتماد الكان هاد الدورة وخداوه من الكاف هو 110 صحافي وتقني ماشي 56. هادي سابقة فتاريخ دورات الكان
علاش هاد الشي كذوب؟ اولا نهار وصول الوفد لابيدجان ركب فجوج كيران للصحافيين. لاكثر من مائة صحافي. كلشي مشى من ابيدجان لسان بيدرو فظروف مريحة مقارنة باللي كاين فهاد البلد الجميل. كانت طونوبيلة صغيرة ركب فيها اللي سميتيوهم "المركب المصالحي الاعلامي" مدكسين كي السردين فهاد الطونوبيلة. دوزو تقريبا 6 سوايع تسخسيخ وكاع الصحافيين كانو اكثر راحة. دابا شكون كذب عليكم يا نقابة نوبير الاموي.
باش وصل الوفد كولو مشاو للتيران ياخدو الاعتماد وكان الزحام. هاد الشي محكمة فيه الكاف ماشي شي حد اخر. اول ما خدا الاقامة هما لبنات. كاين 10 الصحافيات والتقنيات اللي حاضرات لتغطية هاد الكان. تقريبا 10 بالمائة من مجموع الوفد. اول من دخل للوطيل هما.
الاقامة كانت تكلفات بها شركة مغربية لفائدة الجمعية المغربية للاعلام والناشرين. حاجة اخرى خاص يعرفها هادو صحاب لكذوب اللي نشراتو نقابة السي دي تي هو ان مصاريف هاد الاقامة والنقل والاكل كلشي كلشي تكلفات بيه هاد الجمعية اللي سميتوها "المركب المصالحي الاعلامي". لا جامعة الكورة ولا وزارة الاتصال ولا اية جهة خلصات ريال والو. وسيرو شوفو الحسابات وتفهمو. اما الاتفاق اللي كان توقع قبل هاد الكان بين هاد لجهات الثلاث ومعاهم اللجنة الاولمبية٬ فراه كيخص التمثيلية. كيخص التنظيم الذاتي بنقص عدد الجمعيات الخاصة بالصحافة الرياضية اللي كان فيها كثر من 9 الجمعيات وبزاف كثير منها تابع مصالحو. كاين اللي فيها كان كيدي ناس خدامين فالمقاطعات او فالابناك او عندهم مهن لا علاقة لها بالاعلام. هاد الشي كان لسنوات وما عمرنا شفنا نقابة الاموي هزها هاد السلوك الحقير.
الشركة اللي تكلفات بالنقل والاقامة ختارت جوج البلايص. اوطيل حدا البحر واخر وسط لمدينة. التقسيم دار بطريقة عادية. باش وصل الوفد كيكتاشف ان لوطيل الثاني بعيد وما يصلاحش يسكنو فيه الصحافيين. هادي مسؤولية وكالة الاسفار وتعالجات نفس الليلة. تم استبدال هاداك لوطيل بشقق وفيلات سكنو فيهم الجميع باستثناء 5 الصحافيين اللي تحل مشكلتهم من بعد.
كل غرفة فهاد لوطيل او الاقامات فيها جوج صحافيين. هنا خاص واحد التوضيح. راه شي سكان من هاد لمدينة رفضو يكريو لشي صحافيين من الوفد حقاش كيغوتو بزاف. كيضاربو بيناتهم. وقع مشكلة باش تلقى وحدين يكريو ليهم.
صحاب نقابة الاموي كانو يهدرو على كيفاش عاشو الصحافيين فقطر. شي كينعس فالمركز الاعلامي وشي كينعس على برا واللي كان ساكن فبيت كان مقتاسمو مع 4 او 5 صحافيين. قليل اللي قدر يسكن فظروف مريحة وبفلوس المقاولة ديالو. هادوك كانو كيمشيو لا فقطر لا فالغابون وحتى فروسيا باش ياخدو تعويضات كتعطيها الجامعة. كاين اللي كان كياخدو لفلوس وما كيمشيش گاع لتغطية الحدث الرياضي٬ بعدها قررات الجامعة تعطي التعويضات باش يبدا الحدث الرياضي وفعين المكان ماشي فالمغرب.
دابا هادوك اللي قلتو عليهم ساكنين فاقامة اللاجئين راها احسن وانقي من لوطيل اللي عايشين فيه الجزء الاخر من الوفد.
اما بالنسبة للماكلة. راه من اهم نهار كلشي كيتعشى فبيفي فلوطيل. شوفو هاد التصاور يا رباعة الكذابة. هنا كياكلو ويشربو. كلهم كلهم. لا اللي ساكن فلوطيل ولا اللي ساكن فالشقق وفيلات.
دابا جمعية مهنية للناشرين فمحاولة منها وبمبادرة منها دارت هاد المجهود وتجي نقابة تكذب. هادي نقابة ضد الصحافيين ماشي مع الصحافيين. كون كانت مع احترام الصحافيين كون هدرات على امور تهم عمل الصحافي. شكون اللي مشى وماشي صحافي وكيفاش دخل مع هاد الوفد. طبعا الجمعية المغربية للاعلام والناشرين راها غير دبرات هاد القضية فاخر دقيقة. ما دارت لائحة ما ختارت صحافيين ما والو.
اكثر من هاد الشي. واخا كاين لفطور والغدا =لغدا كاع الصحافيين كيكونو برا = وكاين النقل من الاقامة لمكان تداريب المنتخب وللندوات الصحافية وللملعب٬ راه الجمعية عطات لكل صحافي فاليوم الثاني 200 اورو. لاش؟ مصاريف الجيب وصافي.
نقابة الاموي خاصها تعتاذر علي كذوبها. التهميش والتحقير ما كانتش فسان بيدرو. اللي كان فمدينة فيها ندرة فلوطيلات ديال بصاح٬ هو تدبير زوين. سولو الصحافيين اللي دارو تغطيات لاحداث رياضية كبيرة فافريقيا علي الفرق بين هاد الكان وبين اللي سبقوه. سولوهم غاديين تعرفو الفرق يا نقابة تروج الفايك. نقابة كانت فالسابق رمز للنضال من اجل حقوق العمال وربطات بين النقابي والسياسي بطريقة خلاتها تدخل لقلوب لمغاربة.