التكفيري الحقير ابو الجحيم كفر وحرض وكذب وسوق فايك نيوز ودعا للجهاد. “كورونا فيروس” سراب ولا سديتو الجوامع وليتو دار حرب

دابا غاديين نختابرو الدولة واش غادية تتعامل بنفس الصرامة وكثر مع التكفيري المتخلف الحقير ابو النعيم كيف تعاملات مع مروجي الفايك نيوز. هو ما روجش غير الفايك نيوز. هو روج الحقد والكفر. فكلمتو التخريفية كذب وزور كلشي. اول كذبة قالها هاد التكفيري اللي ما قدرش يجبد سيادو الوهابيين اللي سدو الحدود ومنعو العمرة٬ تلميحه بوضاعة ان “كورونا فيروس” يقدر يكون وهم وخيال وسراب. وهاجم وزارة الاوقاف والشؤون الاسلامية والمجلس العلمي الاعلى والرابطة المحمدية لعلماء المغرب والعلماء غير الرسميين وقال انهم سكتو على اجراءات عادية دارتها وزارة الاوقاف على المساجد والصلوات وقال باللي هادو سكتو “اماكن القمار والخمر والفساد وفين كاين السيدا” وللي فيها “الامراض القاتلة”. هنا كذاب وحقير وكيدير الفايك نيوز وكيحرض المتخلفين على ارتكاب حماقات. علاش؟ لان الدولة وقفات ماشي الاماكن كيف كيوصفها عقلو المريض ولكن كاع الاماكن اللي فيها السهر بعد منتصف الليل. يعني كذاب ومحرض وضيع.
وباش يوزع سمو مزيان قال باللي دوز كذبة ثانية وهي انو قال باللي الجوامع كيسدو بسرعة. كذوب فكذوب. كاين دورية واضحة لوزارة الاوقاف علي الصلاة. وهنا سب المشرفين وائمة المساجد وقال عليهم خاصة شي وحدين قراب لدرب السلطان فكازا “منافقين” باغيين “لكريمة” والبقع.
ابو الجحيم زاد فكذوبو ورفع صوتو وبدا يسوق الفايك نيوز ثم داز للتكفير باش قال “نحذر الوزارة ان تقرر منع الصلوات المفروضة فالمسجد” وافتى فتواه اللي كلها دم وقتل “ان البلد الذي تغلق فيه المساجد ولا تصلى فيه الصلوا الحمس ارتد عن دينع واصبح دار حرب وكفر وخروج من الملة” اي كيكول بصريح العبارة خاص الجهاد فيه.
دابا الكويت والعراق ودول كثار كفار باش وقفو الصلاة فالمساجد يا متخلف.
ديما بطريقتو الحقيرة وسمو وكرهو اللي كينشرو بزاف باش قال ان هاد الدولة٬ وهادي كذبة كبيرة خرى٬ “اخر ما يهتمو بيه هو المساجد” واعتابر الامراض “هادي غير انذارات” وتحدى وزير الاوفاق باش بدا يخرف ويقول “حكم الله هو اللي كاين” وطبعا بحال كاع المرضى بحالو ضروري تكون نظرية المؤامرة باش دخل صراع الصين وامريكا وصفقة القرن …
ورجع يهدد وزير الاوقاف “ما هكذا تورد الابل يا وزير الاوقاف تكايس على المساجد” وسالى المتخلف اللي كانو كثار من امثالو فرحانين بتخلفو فتعاليقهم “ايلى تسدات المساجد فانتظروا الساعة والساعة ادهى وامر”
دابا خاص هادا بحال اللي تقدمو للمحاكمة على نشر فايك نيوز يتقدم للمحاكمة. هذا اخطر. مدخل الدين بشكل حقير. نشر سمومو وحقدو. نشر جحيمو