مؤتمر البام..المرشح المحظوظ اللي غادي يرگب التراكتور ويصوگو مزال مامعروفش ومزال مهبطش عليه الوحي

قال قيادي بارز في حزب الأصالة والمعاصرة، في اتصال مع "گود"، بأنه لحد الساعة حتى معارفش شكون غايكون الأمين العام المقبل.
دبا بقات أقل من شهر على المؤتمر الوطني الخامس لحزب الأصالة والمعاصرة لي غايكون ايام 9 و 10 و11 فبراير 2024، ببوزنيقة، ومزال حتى واحد معارفش شكون لي غايجيه الوحي باش يزعم ويعلن راسو مرشح لقيادة هاد الحزب لي كان كيتوصف بحزب الدولة، حسب مصدر قيادي ل"گود".
المرشح المحتمل لقيادة التراكتور مزال ممعروفش، حتى الاسماء لي باينا كتنافس بقوة على منصب الامين العام بحال عبد اللطيف وهبي الامين العام الحالي، وفاطمة الزهراء المنصوري، رئيسة المجلس الوطني للحزب، بجوجهم يمكن كيستناو الوحي باش يعلنو ترشح لهاد المنصب. البام تعرض لزلزال سياسي فقضية اسكوبار الصحراء، كولشي كيستنا كيفاش غادي يدوز المؤتمر وشكون السوبرمان لي غادي ينقذ صورة الحزب من محاولات ربطه بملف اسكوبار كيفما تم انقاذ الحزب فمرحلة سابقة من محاولات السطو عليه من طرف انصار الياس العماري وحكيم بنشماس.
المؤتمر غادي يعرف مشاركة 3000 مؤتمرة ومؤتمر، اغلبهم من جهة مراكش لي معروفين بقوة التنظيم وحاضرين فالهياكل، عكس كازا لي فيها صراعات وكذلك الجهة الشرقية لي مشا ليها دينامو ديالها بيوي المتابع في ملف اسكوبار الصحراء بتهم تتعلق بالاتجار الدولي بالمخدرات.