راه قيمة إنتاج أي حبة ديال الماطيشة في المغرب غادي تلقى واحد السبعين في المية منها تخلصات بالدولار والأورو وتستوردات من برا، المغرب يالله كيوفر الأرض ولما واليد العاملة الرخيصة لي كتموت في حوادث سير جماعية كل مرة وبعض الأسمدة من لو سي بي

المغرب كيعيش جفاف قاصح منذ سنوات، جفاف بحال هذا كون جا شحال هادي كانت غادي تكون كارثة ولكن لحد الآن لما باقي في الروبيني في أغلب المدن النهار كامل والخضرة رخيصة بزاف وهذا بحد ذاتو لغز، الجفاف كيعني سوء الموسم الفلاحي وقلة المعروض والندرة والغلا، وحاليا واخا حتى سنتيم ديال الثلج باقا ماطاحت في إفران والنواحي والويدان والأنهار ناشفة ومع ذلك ماطيشة دايرة جوج دراهم ونص والناس كتعمر منها بالبلاطويات، الخضرة كلها رخيصة وبزاف، والرخا راه عدو لأنه كيشجع على الهدر والضياع فاش كتكون الحاجة معندها قيمة تقريبا، بحال المثل المغربي ماساوي بصلة لي كيرمز لانعدام القيمة، هادشي كيحفز على الإتلاف والتضيع والإسراف في الاستهلاك، وهادشي بحال إلى كيعطي إشارات على كساد كبير جاي في الطريق لأن الرخى لا يبشر بالخير.
خاص ضروري تحديد المناطق المزروعة والزراعات لي غادي تدار فيها لتجنب إغراق السوق بالمنتوج حتى يفقد القيمة ديالو، مايمكنش يبقاو مناطق كثيرة في المغرب كتزرع الدلاح مثلا وفي كل عام نلقاوه معرم جنب الطريق مابغاه بوبي، والمستهلك غير كيشلخ ويلوح هانية، دلاحة بعشرة دراهم وبتيخة بخمسة وكتلقى الخضارة في السوق إلى بقات ليه شي سلعة فالعشية كيسمح فيها ويزيد، راه هدر كبير هاداك ديال الما وديال العملة الصعبة، راه الفلاحة بشكلها الحالي مابقاتش عبارة على لوح الزريعة وتسنى الشتا تطيح وحش الربيع وتسنى الشمس وهانتا حصدتي، الفلاحة حاليا كولشي فيها تقريبا كيجي من برا، الزريعة الدوا الماتريال ديال السقي، الغاز باش كيخدمو الماطر ديال السقى، الأسمدة من غير لي كينتج المكتب الشريف للفوسفاط، راه قيمة إنتاج أي حبة ديال الماطيشة في المغرب غادي تلقى واحد السبعين في المية منها تخلصات بالدولار والأورو وتستوردات من برا، المغرب يالله كيوفر الأرض ولما واليد العاملة الرخيصة لي كتموت في حوادث سير جماعية كل مرة.
هاد الوفرة ديال المنتوجات الفلاحية راها على حساب مستقبل الما في البلاد وعلى حساب الاستقرار والسلم الاجتماعي والهجرة القروية لي غادي يتسبب فيها الجفاف من بعد ماتوكح هاد المناطق الفلاحية كلها، راه المستثمر الفلاحي في الغالب كاري الأرض كيتقبها آبار كلها فاش تنشف أو تموت كيهز فلوسو ويتحول لمنطقة خرى أو بلاد خرى، ليوم في المغرب غدا في موريطانيا المهم سلاسل التوريد ما تحبسش والوفرة تبقى موجودة عند المستهلك الأوروبي وحتى المحلي، هنا فين خاص تدخل الدولة لتقييم وتثمين هاد المنتوجات والبحث على زراعات بديلة ومتنوعة عوض هاد المعاندة لي في السوق دابا، ولي كتسبب في الأسمدة بمختلف أنواعها، يباك حنا البلاد لي تغلبات على كورونا وصنعات اللقاح عندنا في البلاد، إذن على الأقل البلاد تولي تصنع المواد الفلاحية عوض استيراد كولشي من برا في المقابل تصدير قوة العمل دبوسلهام ونجاة ولما ديال الأجيال القادمة.